Presidenti francez Emmanuel Macron i kërkoi anëtarit të kabinetit të luftës izraelite Benny Gantz që të shmangte përshkallëzimin “veçanërisht në Liban”, sipas një deklarate nga presidenca franceze.

Komentet e Macronit vijnë pasi Hamasi akuzoi Izraelin për kryerjen e një sulmi në Bejrut që vrau udhëheqësin e lartë të Hamasit Saleh Al-Arouri të martën. Izraeli nuk e ka marrë përgjegjësinë.

“Presidenti i Republikës theksoi se ishte thelbësore të shmangej çdo qëndrim përshkallëzues, veçanërisht në Liban, dhe se Franca do të vazhdojë t’i përcjellë këto mesazhe për të gjithë “lojtarët” e përfshirë drejtpërdrejt ose tërthorazi në zonë”, thuhet në deklaratën franceze, raporton CNN, transmeton Klan Kosova.

Macron shprehu gjithashtu shqetësim për numrin e viktimave civile dhe urgjencën humanitare në Gaza.

Sulmet izraelite në Gaza kanë vrarë të paktën 22,185 palestinezë, tha të martën Ministria e Shëndetësisë e drejtuar nga Hamasi.

Presidenti francez foli gjithashtu kundër deklaratave “të papranueshme” që bënin thirrje për zhvendosjen e detyruar të banorëve të Gazës.

Dy anëtarë të koalicionit të krahut të djathtë të kryeministrit izraelit Benjamin Netanyahu kanë shprehur ditët e fundit pikëpamjet se banorët palestinezë duhet të largohen nga Gaza, ndërsa zyrtarët konsiderojnë të ardhmen e enklavës bregdetare të pasluftës.