Presidenti i Venezuelës, Nicolas Maduro ka akuzuar liderin kryesor opozitar për lidhje me tentim-vrasjen kundër tij gjatë vikendit, duke përdorur dronë.

Maduro ka drejtuar gishtin drejt liderit opozitar që jeton në ekzil në Kolumbi, Julio Borges, pas siç ka thënë ai një varg intervistash të bëra me gjashtë personat e arrestuar për këtë rast.

“Disa deklarata kanë dhënë shenja për Julio Borges. Hetimet drejtojnë nga ai”, ka thënë Maduro, pa dhënë detaje për rolin e dyshuar të Borgesit.

Kritikët e Maduros kanë thënë menjëherë të dielën pas sulmit, se frikësohen që lideri i Venezuelës do ta përdorë këtë rast si shkas kundër politikanëve opozitarë, në kohën kur janë rritur pakënaqësitë, si pasojë e ekonomisë tejet të dobët.

Në sulmin e së dielës, dy dronë të armatosur kanë shpërthyer derisa Maduro ishte duke folur në një ceremoni ushtarake.

Prokurorët kanë arrestuar gjashtë persona të cilët përballen me akuza për tradhti, tentim-vrasje dhe terrorizëm.

Maduro ka përmendur edhe ligjvënësin opozitar, Juan Requesens, si pjesë të këtij sulmi.

Mirëpo sipas ligjit të Venezuelës, të dy ligjvënësit, si Borges si Requesens kanë imunitet nga Prokuroria.