Nuk kanë të ndalur protestat në Venezuelë kundër rezultatit të zgjedhjeve presidenciale që shpallën edhe njëherë fitues presidentin Nicolas Maduro.

Rezultati u kundërshtua nga opozita dhe faktori ndërkombëtar dhe që nga ajo ditë njerëzit kanë dalë në rrugë për të kërkuar largimin e Maduros, duke u përballur me policinë dhe ushtrinë.

Deri në këto momente raportohet për të paktën 1 229 persona të arrestuar, një pjesë e të cilëve janë gra dhe fëmijë.

Janë rritur shqetësimet për fatin e deputetit të opozitës Américo De Grazia, për të cilin nuk ka asnjë lajm prej më shumë se 24 orësh.

Në daljen e tij të fundit në publik, në Karakas, Maduro vendosi të ndalojë përkohësisht përdorimin e rrjetit social X, i cili, sipas tij, po nxit luftë civile mes venezuelianëve.