Komuna e Malishevës ka filluar punimet në disa nga projektet që kanë qenë të planifikuara të nisin këtë vit.

Kështu është bërë me dije në mbledhjen e rregullt të Këshillit të Drejtorëve, të cilën e ka drejtuar nënkryetari i Komunës së Malishevës, Hajdin Berisha, i cili në të njëjtën kohë ka kërkuar që të mos ketë vonesa në realizimin e projekteve dhe planifikimeve komunale për vitin 2018.

“Të gjitha projektet të realizohen, duke u bazuar në planin dinamik të realizimit të projekteve dhe të mos ketë vonesa të paarsyeshme në realizimin e tyre”, ka thënë nënkryetari Berisha, duke u drejtuar drejtorëve të drejtorive komunale.

Gjithashtu, punimet kanë filluar edhe në disa projekte të bartura nga viti i kaluar.

Në këtë mbledhje u raportua edhe për punët dhe aktivitetet për javën e kaluar dhe planifikimet për javën në vijim, nga të gjitha drejtoritë.

Në këtë mbledhje, nga drejtoritë përgjegjëse u shpreh edhe njëherë shqetësimi për vonesën e shkaktuar nga niveli qendror për realizimin e fushatës së repelimit të kafshëve, si masë parandaluese në luftimin dhe parandalimin e etheve hemorragjike krime kongo.