Zhvillimi i industrisë së mbrojtjes është një nga parakushtet bazë për plotësimin e infrastrukturës së mbrojtjes së një vendi, veçanërisht për Kosovën në kohën në të cilën po kalon shteti karshi sfidave rajonale dhe globale të sigurisë. Në këtë aspekt fuqizimi i partneritetit me sektorin privat është më se i rëndësishëm për avancimin e sigurisë kombëtare.

Kjo është konkluduar në një bashkëbisedim të organizuar të enjten nga Oda Ekonomike Amerikane në Kosovë me ministrin e Mbrojtjes, Ejup Maqedonci.

Gjatë këtij aktiviteti është diskutuar rreth ambientit global të sigurisë, sigurisë në rajonin e Ballkanit Perëndimor dhe nevojës për zhvillimin e industrisë së mbrojtjes në vend me qëllim përballimin e sfidave të ardhshme të sigurisë.

Maqedonci e ka vlerësuar bashkëpunimin me sektorin privat si një nga elementet e rëndësishme për zhvillimin e kapaciteteve të mbrojtjes së vendit dhe një partner potencial për zhvillimin e industrisë së mbrojtjes së vendit tonë.

Ministri Maqedonci, ka thënë se Shtetet e Bashkuara të Amerikës janë aleati kryesor dhe akteri kryesor në rrugëtimin e deritanishëm të Kosovës, veçanërisht në zhvillimin e kapaciteteve të mbrojtjes dhe sigurisë.

Duke folur për investimet potenciale në zhvillimin e industrisë lokale të mbrojtjes, ministri Maqedonci, ka theksuar kompletimin e legjislacionit që do të largonte disa nga barrierat në këtë aspekt.

Ai ka thënë se Ministria e Mbrojtjes është në koordinim të vazhdueshëm me Ambasadën e Shteteve të Bashkuara të Amerikës, respektivisht me Zyrën e Bashkëpunimit në Fushën e Mbrojtjes, përkitazi me furnizimet me pajisje ushtarake.