Përzgjedhësi i Përfaqësueses së Kosovës A, Christos Marmarinos, në konsultim me shtabin teknik, ka shpallur listën e gjerë të basketbollistëve për ndeshjen e qershorit ndaj Danimarkës në kuadër të parakualifikimeve për FIBA Eurobasket 2025.

Në listën e gjerë janë ftuar 14 basketbollistë, të cilët do të mbikëqyren dhe më pas do të shpallet lista përfundimtare. Stërvitjen e parë basketbollistët e zhvillojnë sot (e premte) nga ora 18:00 në palestrën sportive të Kolegjit “ISP” në Marigona Residence.

Sa iu përket të ftuarve, për herë të parë te Kosova A janë ftuar basketbollistët Etnik Peci dhe Ardit Pepaj. “Dardanët” e zhvillojnë ndeshjen me Danimarkën më 30 qershor. Kosova është në grup me Danimarkën dhe Norvegjinë ku renditet e dyta me tri pikë të grumbulluara, aq sa ka edhe Norvegjia në vendin e parë.

Numri i kombëtareve pjesëmarrëse në parakualifikime të FIBA Eurobasket 2025 është 10, ku një grup përbëhet nga katër kombëtare, kurse dy grupe të tjera me nga 3 kombëtare. Katër skuadra, tri fituesit e grupeve, dhe një kombëtare e cila është e renditur në pozitën e dytë, më së miri do të kualifikohen për raundin e dytë parakualifikues. Raundi i dytë do të mbahet midis gushtit 2022, nëntorit 2022 dhe shkurtit 2023.

Lista e gjerë e basketbollistëve:

Valon Bunjaku, Amin Hot, Etnik Peci, Dardan Berisha, Mikaile Tmusiq, Altin Morina, Meriton Ismaili, Ardit Pepaj, Drilon Hajrizi, Muhamedali Janjeva, Rron Ukaj, Samir Zekiqi, Gëzim Morina, Fisnik Rugova.