Kreu i ekipit negociator të Republikës së Kosovës për dialogun me Serbinë, Besnik Bislimi, në një intervistë për Euronews Serbia ka thënë se takimi midis kryeministrit Albin Kurti dhe presidentit serb, Aleksandar Vuçiqit, për propozimin franko-gjerman, ende nuk është mbajtur, përkundër premtimit të përfaqësuesit të lartë të BE-së.

Edhe pse nuk ka zbuluar detajet e propozimit, ai ka deklaruar se plani “de jure” e mbështet qëndrimin e Serbisë se nuk duhet të ketë njohje reciproke në këtë moment.

Pjesë nga inetervista:

Zoti Kurti ka thënë se marrëveshja duhet të përfundojë ose të arrihet deri në mars ose prill. Sa është kjo reale është sipas jush?

Sa është reale është një pyetje tjetër, por marrëveshja e nënshkruar, pra e arritur më 23 nëntor, caktoi afatin se kur duhet mbajtur mbledhja e radhës e grupit special për normalizimin në Kosovë dhe BE. Prandaj, tashmë është rënë dakord që takimi të bëhet në fund të muajit mars. Kjo është arsyeja që zoti Kurti përmend fundin e marsit si afat për nënshkrimin e marrëveshjes. Nëse deri atëherë e kuptojmë se Serbia nuk ka ndërmend të jetë konstruktive gjatë dialogut, kjo do të thotë se procesi i nisur më 23 nëntor do të pezullohet dhe Kosova do të mund të vazhdojë të shqiptojë gjoba për targat ilegale që ende lëvizin nëpër Kosovë.

Përmendët propozimin franko-gjerman ose propozimin evropian, siç quhet tani. Çfarë është aq sekret në lidhje me atë propozim që publiku nuk mund të njihet me të? Çfarë është e shkruar saktësisht?

– Tani ju vetë deklaruat se propozimi është sekret. Nuk është sekret sepse nuk përmban diçka që publiku nuk duhet ta dijë dhe të diskutojë për të, por është sekret sepse që në fillim ka qenë një marrëveshje zoritsh për të mbajtur thelbin e marrëveshjes larg syrit të publikut, në mënyrë që të mos cenojmë procedurat. Megjithatë, në momentin që do të bëjmë njëfarë progresi, gjithçka sigurisht që do të publikohet.

A përfshin propozimi njohjen reciproke si detyrim për nënshkrimin e marrëveshjes?

– E përsëris, ne nuk duhet t’i zbulojmë elementet e dokumentit, por nëse fokusohemi në elementet “de jure”, atëherë mund të themi se dokumenti mbështet qëndrimin e Serbisë ku aktualisht nuk ka kusht  për njohje reciproke.

A prisni tani, pas gjithë atyre problemeve që ndodhën në veri të Kosovës, kthimin e serbëve në institucionet e Kosovës. Tani edhe situata është komplikuar, janë shpallur zgjedhje, janë shpallur konkurse për pranimin e personave të rinj në polici. Mediat në gjuhën shqipe sot kanë bërë të ditur se kryeministri Kurti, gjegjësisht Qeveria, po kërkon nga personat që do të aplikojnë për të punuar në polici, se do të detyrohen të thonë se kanë qen të detyruar të lënë punën në polici. A dini ndonjë gjë për këtë?

– Para së gjithash, kur situata u komplikua, i detyroi njerëzit të largoheshin nga institucionet, e jo kur qeveria u përpoq ta kthente situatën në normalitet. Me vendimin për mbajtjen e zgjedhjeve duam të dekomplikojmë situatën. Ne po përpiqemi të sigurojmë që të ketë institucione që do të përfaqësojnë qytetarët e tyre, që të promovojnë interesat dhe të drejtat e tyre. Deri më tani, Lista Srpska përfaqësonte një monopol dhe pluralizëm zero në veri, i cili nuk ishte domosdoshmërisht i fituar me mjete demokratike dhe që nuk kishte asnjë interes për të promovuar të drejtat e qytetarëve serbë në veri të vendit. Z. Rakiq e mbajti postin e ministrit për komunitete për tetëmbëdhjetë muaj me zero propozime, zero projekte që kanë të bëjnë me promovimin e të drejtave dhe interesave të komunitetit serb në veri dhe në mbarë Kosovën. Ne do të donim të shohim njerëz, individë, si dhe politikanë të cilët nuk do t’i japin përparësi vetëm interesave të një pale apo individëve në Serbi, por interesave të të gjithë serbëve vendas. Kjo është ajo që ne shpresojmë se zgjedhjet e prillit do të prodhojnë. Sa i përket policisë, aktualisht kemi shpallur konkurs. Shpresojmë që do të kemi një numër të madh të kandidatëve, njerëz që do të jenë besnikë ndaj institucionit, sepse siç duket policët që kanë qenë në detyrë deri në dhjetorin e kaluar, i janë përgjigjur qartë Vuçiqit, jo institucioneve të Kosovës. Sipas legjislacionit tonë, këta persona nuk do të mund të kthehen në postet e tyre të vjetra. Duhet të shpallim konkurse të reja për pozita të reja, t’i mbushim me njerëz të rinj që duan ta zbatojnë ligjin në Kosovë dhe të jenë besnikë ndaj këtij vendi.

Opozita e akuzon këtë qeveri për prishjen e marrëdhënieve me partnerët ndërkombëtarë, veçanërisht me SHBA-në. A është kështu dhe çfarë marrëdhëniesh keni me partnerët ndërkombëtarë?

– Ne këtë e interpretojmë si dëshirë boshe të opozitës. Këto janë rezultatet që ata shpresojnë dhe duan të shohin mundësinë që ata të kthehen në pushtet, që për ta barazohet me paratë, por nuk ka asgjë nga këto. Nëse shikoni numrin e vizitave që anëtarët e kabinetit tonë kanë jashtë vendit dhe anasjelltas, pra vizitat ndërkombëtare në Kosovë, do të shihni se marrëdhëniet tona nuk kanë qenë kurrë më të mira.

Opozita ju akuzon edhe për politikë të keqe energjetike, për politikë të keqe shëndetësore, ndaj patëm grevë nga punëtoret e arsimit. A ka një strategji për të zgjidhur të gjitha këto probleme apo ndoshta na presin zgjedhje të reja në të gjitha nivelet?

– Fakti që opozita sheh një problem nuk do të thotë se problemi ekziston. Dhe kur patëm një rritje dyshifrore të prodhimit në vitin 2021, opozita tha se ishim në recesion. Kjo përfaqëson ose mungesën e njohurive nga ana e tyre se çfarë do të thotë recesioni ose një tendencë për të manipuluar opinionin publik. Sa i përket çështjes së energjisë, përkundër të gjitha problemeve që kemi trashëguar gjatë këtyre 23 viteve, siç është mungesa e investimeve në kapacitete të reja, ende nuk ka asnjë vend në rajon që po kalon krizën me kosto më të ulëta dhe me menaxhim më të mirë se Kosova. Nën një, ne nuk kemi rritur tarifat për qytetarët apo kompanitë, por kemi financuar diferencën nga buxheti dhe nën dy, kostoja e përgjithshme në vitin 2022 ka qenë 95 milionë euro. Krahasoni atë me vendet e tjera të rajonit, shuma e të cilave është 500-600 milionë. Në fakt, problemi i opozitës nuk është te dështimi, por te suksesi ynë.