Kosova dhe Serbia  kanë arritur të martën marrëveshjen që parasheh faturimin e energjisë elektrike në katër komunat veriore të Kosovës.

Kjo marrëveshje, sipas zëvendëskryeministri Besnik Bislimi mundëson faturimin e energjisë elektrike “sipas ligjeve dhe sistemit rregullativ të Kosovës”.

Ndaj kësaj deklarate ka reaguar ish-zëvendësministri i Punëve të Jashtme, Anton Berisha, i cili e ka pyetur Bislimin se për çfarë kanë kundërshtuar deri tani, pasi i ka dhënë interpretim pozitiv marrëveshjes.

“Pyetja që shtrohet është: meqenëse i bëni një interpretim pozitiv marrëveshjes, atëherë për çfarë e keni kundërshtuar deri më tani? Cili është ndryshimi që e premtuat gjatë fushatës për të mos pranuar këtë marrëveshje? A e hoqët, siç thonit atëherë nënvendosjen e Kosovës ndaj Serbisë apo e rilidhët Kosovën me Serbinë? Natyrisht, që nuk keni bërë asnjë ndryshim, dhe në realitet pyetjet që do të vazhdojnë janë për radhën e gjatë të mashtrimeve”, ka shkruar Berisha në llogarinë e vet në “Facebook”.