Kushtet e një marrëveshjeje midis Izraelit dhe Hamasit për një armëpushim në Gaza dhe lirimin e pengjeve janë duke u finalizuar, ka thënë për BBC një zyrtar palestinez i njohur me negociatat.

Kjo vjen pasi presidenti amerikan Joe Biden tha se një marrëveshje ishte në prag të realizimit dhe se administrata e tij po punonte urgjentisht për këtë çështje.

Një zyrtar izraelit i tha, gjithashtu, agjencisë së lajmeve Reuters se negociatat ishin në “faza të avancuara”, me një marrëveshje të mundshme në “orë, ditë ose më shumë”.

Zhvillimet e fundit vijnë teksa Netanyahu përballet me kundërshtim të ashpër ndaj një marrëveshjeje të mundshme nga brenda koalicionit të tij qeverisës. Dhjetë anëtarë të krahut të djathtë, duke përfshirë disa nga vetë partia Likud e Netanyahut, i kanë dërguar atij një letër duke kundërshtuar një armëpushim.