Kryetarët e komunave të enjten kanë mbajtur një takim me ministrin e Shëndetësisë, Arben Vitia. Në këtë takim ata kanë kërkuar dhe rekomanduar heqjen e orës policore si dhe largimin e masave të marra për gastronominë.

Me këtë rast, Asociacioni i Komunave të Kosovës (AKK) ka bërë me dije se ministri Vitia u ka thënë se rreth 90 për qind e rekomandimeve të tyre do të merren parasysh.

Njoftimi i plotë i AKK-së:

Kryetarët e komunave sot kanë mbajtur një takim të organizuar nga Ministria e Pushtetit Lokal (MPL) dhe Ministria e Shëndetësisë (MSh) lidhur me situatën pandemike.

Ky takim vjen pas takimit të djeshëm të Këshillit të Kryetarëve në kuadër të Asociacionit të Komunave të Kosovës për të vlerësuar situatë e tashme pandemike nëpër komuna me virusin Covid-19 ku edhe ka dalë me rekomandimet e Komunave.

Takimin e hapi ministri i MPL-s,  z. Elbert Krasniqi, ndërsa për qëllimin e takimit foli ministri i MSh-së, z. Arben Vitia, i cili tha se duam të konsultohemi më kryetarët e komunave lidhur me masat e tashme dhe për hapat e ardhshëm në këtë drejtim.

Kryetari i Asociacionit të Komunave të Kosovës, z. Imri Ahmeti në fjalën e tij informoi dy ministrat për takimin e Këshillit të Kryetarëve.

Kryetari Ahmeti tha se  dje gjithë kryetarët e komunave janë dakorduar që të dilet me këto rekomandime:

1. Qeveria të ketë prioritet vaksinimin e popullatës,
2. Komunat kërkojnë dhe rekomandojnë heqjen e orës policore,
3. Komunat rekomandojnë dhe kërkojnë që masat ndaj gastronomisë të tërhiqen dhe kërkojnë që gastronomia të zbatojë udhëzimet për distancën fizike edhe përmes tavolinave,
4. Komunat kërkojnë që të amandamentohet Ligji mbi pandeminë,
5. Kërkohet nga Qeveria zbatimi i pakos së fundit të përkrahjes ekonomike dhe që të fillohet me një pako të re përkrahëse,
6. Të ketë bashkëpunim dhe bashkërendim të aktiviteteve në mes nivelit qendror dhe lokal në ruajtjen e shëndetit publik dhe ekonomik,
7. Bashkëpunimi në mes inspektoratit qendror dhe atij lokal nuk është në nivelin e duhur. Ky bashkëpunim duhet të fuqizohet në zbatim të masave në mënyrë që të ruhet shëndeti publik.

Ministri i MSh-së, z. Arben Vitia, tha se duhet të kemi kujdes në gjithë hapat meqë situata është mjaft serioze, prandaj duhet një bashkëpunim dhe koordinim mes të gjithë akterëve në mënyrë që  të ruajmë shëndetin publik por të mos dëmtojmë as sektorët e ekonomisë.

Ministri Vitia tha se beson që 90 për qind e rekomandimeve që kanë nxjerr Asociacioni i Komunave të Kosovës në takimin me Këshillin e Kryetarëve do të merren parasysh në vendimet për masat e ardhshme.

Në këtë takim kanë diskutuar edhe kryetarët e komunave ku kanë mbështetur rekomandimet e Këshillit të Kryetarëve, gjithnjë duke ruajtur shëndetin publik, duke respektuar masat por pa dëmtuar sektorët e caktuar të ekonomisë.