Sipas këtij instituti përqindja e të anketuarve që kanë frikë nga një infeksion i mundshëm ra këtë javë në Gjermani 26 përqind.  Javën e kaluar ajo ishte 40 përqind. Sidomos të rinjtë mendojnë se rreziku i virusit të ri për shëndetin nuk është dhe aq i madh. Për këtë arsye edhe mirëkuptimi për masat kufizuese, si kufizimi i daljes në mjedise publike ose mbyllja e dyqaneve gjithashtu ka rënë.

Por, disa lande në Gjermani, zbutjen e masave kufizuese, po e shoqërojnë me detyrimin për mbajtjen e maskave, kur qytetarët përdorin mjetet e transportit publik. Në to, përdoruesit e tramvajeve, metrove, autobusëve ose taksive janë të detyruar të mbajnë maska që mbulojnë gojën dhe hundën, ose si alternativë mbrojtje mund të mbajnë edhe shall. Sa u përket blerjeve në dyqanet me pakicë mbajtja e maskave rekomandohet me forcë, por nuk është e detyrueshme.