Pas divorcit me Hamburgun, mbrojtësi i Kombëtares, Mërgim Mavraj, ka zgjedhur për t’u rikthyer në qytetin e Kolnit, për t’i vijuar përgatitjet individuale deri në çastin e lidhjes me një skuadër të re.

Gjatë qëndrimit në Koln, Mavraj nuk i ka shpëtuar intervistës me “Express.de”. Mbrojtësi shqiptar ka folur gjerë e gjatë për situatën në të cilën ai ndodhet, të ardhmen si dhe për festën e Xhakës dhe Shaqirit në Botëror pas golave ndaj Serbisë.

Mavraj, po stërviteni në Koln për ta mbajtur veten në formë, pse kjo zgjedhje?
Mavraj: Kolni ka qenë dhe është një pjesë e rëndësishme e jetës sime. Tani është një moment i veçantë, pasi nuk ka diçka të sigurt për të ardhmen. Ndaj është e rëndësishme të jem këtu me miq të vërtetë. Mund të kisha shkuar të stërvitesha me Beni Kugel në Majorka, por këtu në Koln kushtet janë po aq të kompletuara.

Cila tjetër? Ku do të shkoni?
Mavraj: Është e vështirë të them se ku do të shkoj. Sigurisht, objektivi është që të jetë kategoria e parë, kudo. Ka disa opsione, këtu dhe jashtë. Në moshën 32-vjeçare nuk mendoj se jam pranë pensionit. Pa dyshim është edhe një shtysë për t’i ndëshkuar kritikët të cilët e thonë pikërisht këtë gjë.

Te Kolni ishit një siguri. Pastaj mbrojtja dështoi. Ishte fatale për të dyja palët që u larguat, apo jo?
Mavraj: Ishte rruga më e vështirë që zgjodhëm të dyja palët. Në fund, rezultati nuk ishte ai që kishim shpresuar. Megjithatë, Hamburgu ishte një përvojë e rëndësishme për jetën, ndonëse kapitulli u mbyll pa lavdi. Pa dyshim, unë do të kisha dashur të luaja në Evropë me Kolnin, për këtë nuk ka dyshime.

Si e keni përjetuar nga distanca rënien e Kolnit nga kategoria, me dorëheqjen e Shtoger dhe Shmadtke?
Mavraj: Ishte shumë e papritur, por kështu ndodh edhe në jetë. Suksesi sjell gabimet më të mëdha. Sigurisht, ka gjithmonë sinjale, por është e vështirë t’i shohësh ato kur je mirë. Kjo tashmë mund të aplikohet edhe me Federatën Gjermane. Sigurisht se u mërzita nga ajo që pashë, por edhe te Hamburgu  nuk di të them në të vërtetë se cila ishte arsyeja e zhgënjimit, ndonëse isha vetë aty.

Si e përjetuat Kupën e Botës? Duhet të keni ndjerë dhembje pasi luajtët një rol të mirë me Shqipërinë në “Euro 2016”…
Mavraj: Ekipi kombëtar ka qenë motivimi im më i madh në muajt e fundit. Këtë dëshirë, për t’u kthyer diçka mbrapsht njerëzve të mi, kam arritur ta ruaj edhe në një çast të vështirë sportiv, në një moment kur njerëzit nuk kanë shumë respekt ndaj teje. Kjo dëshirë më ka mbajtur gjallë nga ana sportive. Është diçka e këndshme ta arrish Evropianin me Shqipërinë, dua të punoj për atë objektiv përsëri.

A mund të na i shpjegoni gjestet e Xhakës dhe Shaqirit në Botëror pas golave me Serbinë që sollën kaq polemika?
Mavraj: Historia luan një rol të madh. Ka qenë një periudhë e errët që nuk duhet të përsëritet. Ka pasur luftë në mes të Shqipërisë dhe Serbisë deri vonë. Fati e desh që prindërit e këtyre djemve të arratiseshin atëherë. Por këto vlera të origjinës, që njeriu i mban në vetvete, nuk harrohen. Xhaka e dashuron Zvicrën, por te Zvicra lufton si një shqiptar. Kjo do të thotë se ata këndojnë këngë shqiptare, festojnë martesat si shqiptarë, ruajnë traditat dhe festojnë me këto simbole. Është diçka e mirë që nuk fshihet një gjë e tillë nga një qenie njerëzore. Duhet të jesh tolerant. Dhe ajo që është më thelbësore, është se golat e tyre kanë ndihmuar më shumë Zvicrën se Shqipërinë.

A kishte ndonjë shans të ktheheni te Koln?
Mavraj: Unë nuk di të ketë pasur kontakte. Këto gjëra dalin kur prodhohen informacione përgjysmë. Sigurisht ishte e këndshme të luaja te Kolni, por e shoh skuadrën tani, është në një pozitë të mirë dhe ka cilësi. Pa dyshim pritshmëria te Hamburgu dhe Kolni është më e larta edhe në Ligën e Parë. Të gjithë presin të dominojnë që në ndeshjet e para, por unë ju them se do t’ia dalin. Cilësia në Bundesligën 2 nuk është aq e lartë. Sigurisht, diferencat mes skuadrave janë të vogla, por niveli nuk është aq i lartë.