Muhamet Mavraj, njëri ndër organizatorët e protestave të vitit 1997, ka deklaruar se kishte pasur ftesë nga kryeministri Albin Kurti që sot të merrte pjesë në homazhe tek varri i profesorit Ejup Statovci dhe po ashtu edhe në takim me organizatorë të tjerë, por që ky nuk kishte pranuar të shkojë.

Mavraj për “Klan Kosova” ka thënë se e ka parim që kur i ka shokët në pushtet nuk iu shkon dhe nuk i përgjigjet ftesave të tyre, sepse siç ka thënë “në fund të fundit jam edhe botues gazete”.

Përveç kësaj, Mavraj ka thënë se është i zhgënjyer me qeverinë për marrëveshjen e fundit të arritur në mes të Kosovës e Serbisë për çështjen e targave, dhe po ashtu edhe me disa vendime të Kurtit që ai i ka quajtur të çuditshme.

“Disa nga ato janë të çuditshme, disa nga sjelljet e tij janë të çuditshme. Pjesëmarrja në zgjedhje në Shqipëri ishte një budallallëk që s’matet me asgjë hiç, është e kotë, është një ftohje e panevojshme e marrëdhënieve me Shqipërinë”.

“Pastaj janë disa tone që s’janë të përshtatshme për marrëdhëniet tona me ShBA-në. Duhet krejtësisht ndryshe të ruhen miqtë, të ruhen aleatët, e shihni tash situatën se pa ta s’do të dilnim nga kjo situatë ku ne ishim, kemi mundur të dilnim shumë më keq se sa kjo marrëveshje që është tani sa i përket tabelave të veturave”.

“Mendoj se i duhen më shumë konsultime ose me shumë kthim ndoshta në atë frymën e shoqërisë së vjetër që të mos e humb rrugën. Shoqëria e vjetër është fryma që e kemi pasur gjithmonë, orientimi ynë ka qenë i saktë – NATO, ShBA, BE – ky trekëndësh nuk luan, dhe në këtë plan pak jam i shqetësuar”.

“Sa i përket marrëveshjes së arritur për targat, jam zhgënjyer me zbritjen e nivelit të policisë speciale të Republikës së Kosovës në nivel me ato bandat që kanë bllokuar rrugët atje. Mendoj që kjo është e padrejtë ndaj policisë speciale. Siç e dini, ata do të tërhiqen njëkohësisht përgjatë tetë orëve dhe asnjëra palë nuk mund të tërhiqet një minutë para ose pas tjetrës dhe kjo më ka lënduar shumë”, ka përfunduar Mavraj.