Kryeministrja britanike, Theresa May, ka hedhur poshtë pretendimet se ajo nuk beson te Brexit-i duke këmbëngulur se ajo do ta bënte një sukses të saj Brexit-in, pavarësisht rezultatit të bisedimeve.

 Ajo ka deklaruar për “BBC” se plani i saj për tregtinë me Bashkimin Evropian pas Brexit nuk kishte vdekur, edhe pse është refuzuar nga krerët e BE-së. “Unë besoj te Brexit. Ç’është më e rëndësishmja, besoj te Brexit që të respektojë votën duke mbrojtur gjithashtu bashkimin tonë, duke mbrojtur vendet e punës dhe duke siguruar sukses të Brexit për të ardhmen. Kjo është arsyeja pse unë jam ambicioze për këtë vend. Kjo është arsyeja pse unë dua që ne të marrim një marrëveshje me të vërtetë të mirë të tregtisë së lirë me Bashkimin Evropian, gjë që është në qendër të planit”, ka deklaruar May, duke shtuar se ishte e përgatitur për një skenar ku nuk ka marrëveshje me BE-në. “Ne do ta bëjmë një sukses Brexit-in, pavarësisht nga rezultati i negociatave”, ka deklaruar ajo.

May ka folur edhe pwr Partinë Laburiste e cila ka thënë se do ta mbështesë znj. May në Parlament nëse ajo pajtohet me planin e tyre për një bashkim doganor me BE dhe një marrëveshje Brexit që garanton të drejtat e punëtorëve dhe mbron vendet e punës.  “Mesazhi im ndaj Partisë Laburiste është se ata duhet të ndalojnë të luajnë politikën me Brexit dhe të fillojnë të veprojnë në interes kombëtar. Mesazhi im për partinë time është që të bashkohemi dhe të marrim marrëveshjen më të mirë për Britaninë”, ka thënë May.

Udhëheqësit e BE kanë hedhur poshtë planin e Theresa May, sepse ata besojnë se kjo do të dëmtonte tregun e vetëm, duke lejuar Mbretërinë e Bashkuar të merrte “copat” e ligjit të BE-së që i pëlqen dhe të hedhë pjesën tjetër./tch/