Në Aeroportin Ndërkombëtar të Prishtinës “Adem Jashari”, sonte në orët e mbrëmjes ka aterruar një aeroplan ushtarak britanik.

Në të ishin ushtarët britanikë, të cilët do t’i bashkohen forcave të KFOR-it në Kosovë.

Lajmin për aterrimin e tyre e bëri të ditur NATO-ja përmes një postimi në X.

“Personeli i Mbretërisë së Bashkuar nga Regjimenti Mbretëror i Yorkshire i caktuar në forcat rezervë të NATO-s në mbështetje të misionit të KFOR-it të udhëhequr nga NATO-ja është vendosur përkohësisht në Kosovë, për një ushtrim rutinë të stërvitjes së provave operative me trupat e tjera të KFOR-it”, ka shkruar NATO në postim.

Ky ushtrim është planifikuar të zgjasë nga data 18 shtator deri në fund të tetorit.

Kontingjenti ushtarak britanik përbëhet nga më shumë se 300 trupa.

KFOR-i ka njoftuar paraprakisht se qëllimi i këtyre stërvitjeve është që të testojë procedurat ekzistuese për dislokimin e trupave shtesë dhe integrimin e tyre brenda misionit të KFOR.

“Qëllimi i stërvitjeve është të testojë procedurat ekzistuese për dislokimin e shpejtë të trupave shtesë dhe integrimin e tyre me misionin e KFOR-it. Stërvitja mbështet gatishmërinë e KFOR-it për t’iu përgjigjur zhvillimeve relevante të sigurisë, në mënyrë që të sigurohet zbatimi i vazhdueshëm dhe efektiv i mandatit tonë të OKB-së – bazuar në Rezolutën 1244 të Këshillit të Sigurimit të Kombeve të Bashkuara të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme”.

Misioni paqeruajtës ka thënë se pas përfundimit të stërvitjes, kontingjenti do të kthehet në Mbretërinë e Bashkuar.

“KFOR do të marrë të gjitha masat për të zbutur efektet në trafikun rrugor, të cilat mund të priten si rezultat i lëvizjeve së personelit ushtarak dhe automjeteve para dhe gjatë stërvitjeve”, u tha në njoftimin e KFOR-it.