Mbi 300 nxënës të Komunës së Klinës të nivelit fillor dhe të mesëm kanë marrë pjesë në Garën Ndërkombëtar të Matematikës “Kangaroo”.

Këtë garë e cila është mbajtur në ambientet e Shkollës së Mesme Teknike “Fehmi Agani” në Klinë, e ka përcjellë nga afër drejtori i Arsimit, Arben Limani.

“Interesimi i nxënësve për të marrë pjesë ka qenë jashtëzakonisht i madh. Organizimi është mjaftë i mirë dhe kjo garë është një formë e mirë për nxënësit që të ambientohen në testet e ardhshme dhe që të shpalosin talentin e tyre në lëndën e matematikës”, ka thënë Limani.

Ai ka thënë se pushteti lokal është i përkushtuar në rritjen e cilësisë në arsim, sidomos në lëndën që janë prioritare, siç është matematika.

Për mbarëvajtjen e garës është përkujdesur Drejtoria Komunale e Arsimit (DKA) në Klinë në bashkëpunim me arsimtarët e lëndës së matematikës.

Instituti “Atomi” me përkrahje nga MAShT-in dhe autorizim të Asociacionit Kangourou Sans Frontieres (AKSF), kanë organizuar Garën Ndërkombëtare të Matematikës në Kosovë.

“Kangaroo” është gara me e popullarizuar në botë për matematikë, që ka për qëllim promovimin dhe popullarizimin e matematikës, si dhe përkrahjen e talentëve të fushës së matematikës.

Të drejte pjesëmarrje në këtë garë kanë pasur të gjithë nxënësit prej klasës II deri në klasën e XII, pa marrë parasysh suksesin e tyre.
Vitin e kaluar në këtë garë kanë marrë pjesë mbi 6 milionë nxënës nga mbi 170 shtete të ndryshme të botës.