Mbi 90 për qind e mësimdhënësve janë të vaksinuar
Tridhjetë e nëntë shkolla janë duke e organizuar mësimin në skenarin e rikthimit dhe 22 në grupe. Kështu ka bërë me dije zëvendësministrja e Arsimit, Shkencës, Teknologjisë dhe Inovacionit, Edona Maloku-Bërdyna në konferencën e rregullt për media, duke u bazuar në të dhënat e Inspektorit të Arsimit në Prishtinë.
Ajo është pyetur në lidhje me organizimet që janë duke u bërë në shkollat, ku do të organizohet procesi zgjedhor më 17 tetor.
“Planifikimi do të bëhet me institucionet e linjës. Për momentin nuk kemi një vendim rreth kësaj”, ka thënë ajo.
Maloku-Bërdyna u bëri thirrje nxënësve dhe mësimdhënësve që të respektojnë masat në fuqi anti-Covid.
“Për të vijuar me këtë skenar, ju bëjmë thirrje nxënësve dhe mësimdhënësve që të respektojnë të gjitha masat anti-Covid”, ka thënë ajo.
Më tej, ajo ka folur edhe për shpërndarjen e teksteve shkollore.
“Për klasat 3 dhe 8, këtë vit janë tekstet e reja. Ekipet e MASHTI-të sot kanë dalë në terren për të parë se si po shkon procesi i shpërndarjes së teksteve shkollore. Mbi 90 për qind e mësimdhënësve dhe stafit tjetër janë të vaksinuar”, ka deklaruar Maloku-Bërdyna.