Mbi dyzetmijë shtetas të Republikës së Kosovës kanë hequr dorë nga shtetësia që nga viti 2009 e këndej, kanë bërë me dije për “Radion Evropa e Lirë”, zyrtarë nga Ministria e Punëve të Brendshme (MPB).

Sipas të dhënave të katër vjetëve të fundit, mesatarisht në vit nga nënshtetësia e Kosovës janë liruar më shumë se 5. 000 mijë qytetarë. Trendi i lirimit nga nënshtetësia ka shënuar ngritje nga viti 2014.

Në vitin 2014 nga nënshtetësia e Kosovës kanë hequr dorë 5,158 persona, kurse më 2016, ky numër ka shënuar rritje në 5.871 persona.

Rroksana Qarri, drejtoresh e zyrës për komunikim publik në MPB, ka thënë se numri më i madh i atyre që kanë humbur shtetësinë e Republikës së Kosovës, vjen nga shtetasit e Kosovës që jetojnë në Gjermani.

“Arsyet kryesore të heqjes dorë nga shtetësia janë marrja e shtetësisë së ndonjë vendi tjetër të Bashkimit Evropian, i cili nuk lejon dyshtetësinë për shtetas që nuk janë shtetas të Bashkimit Evropian. Pra, siç mund ta shihni bëhet fjalë për shtetas të Republikës së Kosovës, të cilët jetojnë në shtete të ndryshme të Bashkimit Evropian që një kohë të gjatë jetojnë në atë vend dhe i plotësojnë kushtet ligjore për ta marrë shtetësinë e atij vendi”, ka thënë Qarri.

Përfaqësues të shoqërisë civile në Kosovë konsiderojnë se një nga arsyet e lirimit të qytetarëve nga nënshtetësia e Kosovës dhe marrja e shtetësisë së një shteti tjetër, përveç tjerash, është edhe ngecja që ka shënuar vendi në zhvillimin e gjithëmbarshëm, në veçanti atë ekonomik.

Isuf Zejna, nga organizata “Demokracia Plus”, në një prononcim për “Radion Evropa e Lirë”, ka thënë se lirimi i qytetarëve të Kosovës nga nënshtetësia dhe marrja e nënshtetësisë së një vendi tjetër, nuk është një gjë e mirë që po i ndodh shtetit.

“Kjo vjen si rezultat i emigracionit të madh që e kemi në Kosovë, për shkak të mosperspektivës ekonomike, qytetarët tanë kërkojnë vazhdimisht të gjejnë punë dhe të dislokohen nga vendi i tyre i lindjes dhe të kërkojnë mirëqenie në shtetet e Evropës Perëndimore. Një numër i këtyre shteteve, siç është rasti i Gjermanisë, nuk iu japin nënshtetësi qytetarëve të Kosovës pa hequr dorë nga nënshtetësia e Kosovës. Si rezultat i kësaj, qytetarët detyrohen të heqin dorë nga nënshtetësia e Kosovës”, ka thënë Zejna.

Fajtor për gjithë këtë, Zejna ka thënë se është shoqëria në përgjithësi e Kosovës, e cila, siç thotë ai, ka dështuar në krijimin e një ekonomie të zhvilluar, e cila siguron mirëqenie më të mirë për qytetarët.

Ai ka thënë se numri i qytetarëve të Kosovës që jetojnë në vende të ndryshme të botës, e të cilët do të heqin dorë nga nënshtetësia e vendit të tyre, mund të rritet në të ardhmen, për shkak se mundësitë që iu ofrojnë shtet ku ata jetojnë, janë shumë më të mëdha sesa çfarë iu ofron Kosova.

“Ekonomitë e mëdha mund t’iu ofrojnë kushte më të mira këtyre njerëzve sesa Kosova. Sot mund të jeni kirurgu më i mirë në Kosovë, po nuk ke perspektivë shumë të madhe, pagat janë të ulëta nuk ka beneficione, në anën tjetër shtetet e Evropës perëndimore i ofrojnë dhjetëfishin e pagës që e marrin (kirurgët) në Kosovë dhe beneficione tjera që Kosova fatkeqësisht është jo konkurrente t’i bëjë ballë këtij trendi të shpërnguljes së njerëzve, në veçanti atyre të kualifikuar”, ka deklaruar Zejna.

Sipas të dhënave të Ministrisë së Diasporës në Qeverinë e Kosovës janë rreth 400 mijë qytetarë që jetojnë në vende të ndryshme të Evropës dhe botës. Këto janë rezultate të regjistrimit të diasporës në kuadër të projektit “Ti je pjesë e atdheut”, të publikuar në vitin e kaluar.

Sipas këtyre rezultateve, numri më i madh i qytetarëve të Kosovës, jetojnë në Gjermani, Zvicër, pastaj në Itali, Suedi dhe Kanada.

Numri i qytetarëve të Kosovës që jetojnë në vende të ndryshme të botës konsiderohet të jetë edhe më i madh. Të dhënat përfundimtare të regjistrimit të diasporës pritet të publikohen në vitin 2021, pasi që të përfundojë edhe regjistrimi elektronik, i cili vazhdon të jetë aktiv.