Mbrojtja e Kadri Veselit i ka kërkuar edhe njëherë gjyqtarit të procedurës paraprake në Gjykatën Speciale që ta lirojë përkohësisht nga paraburgimi ish-kryetarin e Kuvendit të Kosovës me apo pa kushte.

Në dokumentin argumentues të cilin mbrojtja ia ka dërguar gjyqtarit është thënë se prokuroria ka paraqitur si provë shtesë intervistën e sekretarit të OVLUÇK-së, Faton Klinaku që sipas mbrojtjes nuk është relevante për të mbajtur në paraburgim Veselin.

Më tutje, mbrojtja e Veselit që përfaqësohet nga avokati britanik, Ben Emmerson, ka listuar dy kushte që ish-kryetari i PDK-së të mbrohet në liri.

“Në rastin e kaluar, kur avokati i mbrojtjes i shkroi drejtorit të Policisë së Kosovës (‘drejtorit’), ai nuk propozoi listë të hollësishme të kushteve. Dërgesa elektronike e 31 majit 2021, të cilën Zyra e Prokurorit të Specializuar e vlerëson si përsëritje të një ‘vullneti të përgjithshëm për zbatimin e urdhrave juridikë’, ishte shkruar përmes një mënyre të një përgjigje specifike ndaj një letre nga avokati, e datës 26 maj 2021, në të cilën ai i shpalosi kushtet e hartuara pas vëzhgimeve të bëra nga Dhoma e Apelit. Në këtë mënyrë, përgjigjja pohuese e drejtorit ndaj një liste të kushteve të propozuara, që drejtpërdrejt e adreson justifikimin e vetëm të vërtetë për ndalimin e vazhduar të tij (më saktësisht, rreziku i komunikimeve të fshehta me përkrahësit) është goxha qartazi ndryshim i rrethanave. Gjyqtari i procedurës paraprake do të sjellë ndër mend se nuk ka vetëm supozim të pafajësisë, por supozim të lirisë. Këto dy supozime duhet të hidhen poshtë me qëllim që të justifikohet ndalimi i vazhduar. Nëse shkurtësia e përgjigjes së drejtorit kërkon elaborim të mëtejmë, mbrojtja do të paraqesë me respekt që përgjegjësia tani bie te gjyqtari i procedurës paraprake për të kërkuar çfarëdo qartësimi të nevojshëm sipas procedurës në rregullën 198. Nëse është e nevojshme, Drejtorit duhet t’i kërkohet që të komentojë, qoftë me pohim apo negativisht, rreth zbatueshmërisë së secilës prej kushteve të propozuara”, thuhet në kundërpërgjigjen e shkresës së mbrojtjes së Veselit.

Në konkluzion e mbrojtjes është kërkuar që Kadri Veseli të lirohet përkohësisht nga paraburgimi.

“Gjyqtarit të procedurës paraprake i kërkohet me respekt të urdhërojë lirimin e përkohshëm të z. Veseli me ose pa kushtet e propozuara”, është thënë në shkresën e mbrojtjes së Veselit.