Autoritetet kufitare amerikane mbyllën dy ura mes Shteteve të Bashkuara dhe Meksikës të enjten herët në mëngjes, pas protestës së rreth 300 emigrantëve, kryesisht nga Amerika Qendrore.

Protesta u zhvillua në qytetin meksikan Matamoros që ndodhet pranë qytetit Brownsville të Teksasit.

“Trafiku në dy urat ndërkombëtar,e atë Gateway dhe B&M u ndal përkohësisht rreth orës 01:30 pasi një grup prej rreth 250 deri 300 emigrantësh pa dokumente, ishin grumbulluar në mes të urës Gateway”, i tha një zyrtar amerikan i agjencisë së Mbrojtjes së Doganave dhe Kufirit, Zërit të Amerikës.

Trafiku në urën B&M rifilloi pas rreth dy orësh ndërsa ura Gateway qëndroi e mbyllur në të dy drejtimet për më shumë se shtatë orë, tha i njëjti zyrtar. Sipas medias meksikane protestuesit ishin kryesisht nga Hondurasi. Ata ishin përpjekur të hynin në territorin amerikan si një grup i vetëm gjatë natës. Sipas njoftimit të dhënë nga një radio me qendër në Mexico City, “MVS Noticias”, protestuesit kërkonin përpunimin e menjëhershëm të kërkesave të tyre për azil në Shtetet e Bashkuara.

Në fotografitë e postuara nga gazetarët meksikanë në mediat sociale duken burra e gra tek qëndrojnë mbi urë. Brownsville është një nga portet hyrëse ku është ndërtuar dhe një gjykatë e përkohshme për të përpunuar dokumentet e atyre personave të kthyer në Meksikë nën atë që njihet si Protokolli i Mbrojtjes së Emigrantëve. Ky i fundit i detyron azilkërkuesit të qëndrojnë në Meksikë derisa të nisë çështja e tyre.

Ndërkohë sipas një zyrtari të agjencisë së Mbrojtjes së Doganave dhe Kufirit, seancat gjyqësore në Brownsville të planifikuara për të enjten në mëngjes u “shtynë për një datë të mëvonshme”. Zëri i Amerikës ka kërkuan informacion nga Departamenti i Drejtësisë se për kur janë planifikuar seancat e emigracionit.