Xhamia në fshatin Halabak të Podujevës është mbyllur përkohësisht, pas një përleshje dypalëshe, të cilët ishin pro dhe kundër hoxhës së ri në fshat, që ishte emëruar nga Bashkësia Islame e Kosovës.

“Si rezultat i tensionimit të situatës, kjo xhami mbyllet përkohësisht, deri në një vendim tjetër nga ana e KBI-së Podujevë. Vendimi nxirret pas koordinimit edhe me Kryesinë e BIRK”, është thënë në vendimin e Këshillit të Bashkësisë Islame të Podujevës, të vendosur në derën kryesore të xhamisë.

Më tutje, në vendim i është kërkuar xhematit që faljen e namazeve përkohësisht ta bëjnë në xhamitë e tjera përreth.

“Ftojmë për unitet, falje e mirëkuptim!”, është thënë në këtë vendim.

Hoxha i caktuar nga Bashkësia Islame e Kosovës, me të shkuar për herë të parë për të kryer ritet fetare, është tentuar të pengohet nga katër persona, pasi që nuk janë pajtuar me imamin e caktuar nga BIK-u. Të njëjtit kanë tentuar që ta sulmojnë hoxhën, por ky i fundit është mbrojtur nga tre të tjerë, me njërin prej tyre që ka sulmuar me kondak të revoles njërin nga katër personat që tentonin të pengonin hoxhën, duke i shkaktuar lëndime trupore.

Grupi i tre personave që mbrojtën hoxhën gjenden në arrati, ndërsa në shtëpinë e të dyshuarve është gjetur një fotroll e revoles.

I gjithë rasti ka ndodhur mbrëmjen e së shtunës. /Klan Kosova/