Komisioni për Legjislacion, Mandate, Imunitete, Rregulloren e Kuvendit dhe mbikëqyrjen Agjencisë kundër Korrupsionit, ka njoftuar se më 29 nëntor do të fillojë intervistimi i 21 kandidatëve për pozitën e drejtorit të kësaj agjencie.

Deputeti i LDK-së, Driton Selmanaj, ka treguar në detaje për punën dhe raportin lidhur me aplikacionet e pranuara për pozitën e drejtorit të kësaj agjencie. “Ne më datën 21 kemi shqyrtuar aplikacionet për pozitën e drejtorit te Agjencisë kundër korrupsionit. Nga 25 aplikacione, katër prej tyre nuk i kanë plotësuar kriteret për të vazhduar tutje ndërsa të tjerët do të vazhdojnë tutje. Kemi punuar për rreth shtatë orësh për t’i shikuar në detaje këto aplikacione”, ka thënë Selmanaj.

Të pranishëm në këtë komision në mënyrë online ishin edhe përfaqësues nga ambasada britanike që janë duke monitoruar këtë proces.

Kryetari i Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen Agjencisë Kundër Korrupsionit, Adnan Rrustemi, ka thënë se data e mbajtjes së intervistimit do të jetë më 29 nëntor, ndërsa faza për trajnimin e anëtarëve të komisionit do të vendoset ditëve në vazhdim.