Lëvizja Vetëvendosje ka lëshuar një tjetër video përmes së cilës ka tentuar ta hedhë poshtë aferën me rezerva shtetërore duke u fokusuar vetëm te ideja që nga viti 2019, deri në vitin 2023, rezervat shtetërore janë rritur për 25 milionë euro.

Në këtë video thuhet se të gjitha zhvillimet që i ka sjellë Qeveria Kurti, nuk iu pëlqyen “humbësve dhe zhvatësve të këtij vendi”, duke iu referuar liderëve opozitarë – Memli Krasniqit, Lumir Abdixhikut, dhe Ramush Haradinajt, shkruan gazeta online Reporteri.net.

“Hodhën në ajër ide imagjinare për afera gruri, afera vaji, afera martini, afera këso e aso, dhe kur panë që asgjë s’po ngjitet, dolën me audioinçizime të militantëve të tyre për të provuar baltosjen e njerëzve tanë nëpër institucione”, thuhet në video.

“Asnjë provë a dëshmi, por vetëm shpifje ndaj qeverisë që nuk po ua lagë fytin si qeverisjet e kaluara”.

Sipas LVV-së, këta të fundit po e përdorin Prokurorinë Speciale për të sulmuar pushtetin, për çka edhe ka shtyer Qeverinë Kurti që të nisë një fushatë kundër Prokurorisë.

Tutje, LVV u krenua edhe me 400 mijë vende aktive të punës, 40 mijë prej tyre që thonë se u hapën nga ky pushtet.

Më 18 gusht, Prokuroria Speciale kreu bastisje duke arrestuar Ridvan Muharremin, i njohur për afërsinë e tij me kryeministrin Kurti si dhe dy zyrtarë të tjerë të MINT, të akuzuar për dallavere me rezerva shtetërore.

Ndaj tyre është caktuar masa prej 30 ditësh paraburgim.