Premier Liga angleze do të nisë së përdoruri teknologjinë gjysmë të automatizuar për rregullin “offside” të shtunën më 12 prill, në ndeshjen mes Manchester Cityt dhe Crystal Palacet në Etihad Stadium.

Vendimi për futjen e kësaj teknologjie në funksion pason testimin jo-live në Premier Ligë dhe operacionin live në FA Cup këtë sezon.

Premier Liga, në faqen e saj zyrtare, tha se teknologjia gjysmë e automatizuar për pozitën jashtë loje automatizon elementët kryesorë të procesit të vendimmarrjes për të mbështetur gjyqtarin e VAR-it.

Ky sistem u tha se siguron vendosje më efikase të linjës virtuale jashtë loje, duke përdorur gjurmimin optik të lojtarit dhe gjeneron grafikë virtuale për të siguruar një përvojë të përmirësuar në stadium dhe transmetim për fansat.

Teknologjia thuhet se ruan integritetin e procesit duke rritur shpejtësinë, efikasitetin dhe qëndrueshmërinë e vendimmarrjes në pozicion jashtë loje.

Klubet e Premier Ligës miratuan njëzëri përdorimin e kësaj teknologjie, që shkurt njihet si SAOT, për sezonin 2024-25, dhe ndërsa liga fillimisht synonte ta zbatonte atë më herët gjatë fushatës, prezantimi i tij u vonua.