Burri më i vjetër në Mbretërinë e Bashkuar ka zbuluar sekretin e një jete të gjatë ndërsa ai festoi ditëlindjen e tij të 110-të.

Ashtu si poeti Hesiod, dramaturgu romak Plautus, si dhe Sokrati dhe Aristoteli, adhuruesi i peshkut dhe patateve të skuqura, John Alfred Tinniswood është i bindur se ‘vetëpërmbajtja në gjithçka’ është sekreti i jetëgjatësisë.

Banori i Southport shtoi të shtunën, teksa mori telegramin e tij të dhjetë nga Mbretëresha, se nuk e besoi kur iu tha se ishte bërë njeriu më jetëgjatë i vendit.

“Nuk ndihem i vjetër, vazhdoj jetën me miqtë e mi”, ka thënë ai.

Kur u pyet nëse kishte një eliksir rinie, ai shtoi: “Një fjalë: Vetëpërmbajtja. Vetëpërmbajtja në çdo gjë dhe në të gjitha gjërat. Vetëpërmbajtja në ushtrime, shkrim, dëgjim”.

Ai shtoi se ishte gjithashtu jetike për të ‘zgjeruar vizionin tuaj’, duke thënë: ‘Mos qëndroni me një gjë gjatë gjithë kohës. Kaq shumë njerëz sot janë si dele, shumë njerëz e kalojnë jetën duke mos menduar për veten e tyre. Asnjëherë nuk duhet të tejkaloni atë që bëni zakonisht, përndryshe ju do të dëmtoni veten si fizikisht edhe mendërisht. Pra, qëndroni brenda kufijve të asaj që mund të bëni”.

Hesiod, i cili jetoi rreth 700 p.e.s, mendohet të jetë personi i parë që ka shpikur aforizmin “gjithçka në vetëpërmbajtje”, shkruan Independent.

John shtoi se kujtimet e tij më të bukura ishin nga martesa e tij dhe lindja e vajzës së tij, Susan, dhe u vizitua në shtëpinë e kujdesit “The Hollies” nga Mark Blundell, Lord-Toger i Merseyside, i cili ia dorëzoi kartolinën e fundit të ditëlindjes nga Mbretëresha.

Ai ka punuar si nëpunës depoje dhe kontabilist për Shell-Mex dhe BP dhe është baba i një fëmije, gjysh i katër fëmijëve dhe stërgjysh.

John u martua me gruan e tij Blodwen në vitin 1942 dhe ata patën fëmijën e tyre të vetëm Susan. Gruaja e tij vdiq pas 44 vjetësh martesë, në vitin 1986.

I lindur në Liverpool më 26 gusht 1912 – viti kur Titaniku u mbyt – ai u ka mbijetuar dy luftërave botërore, ai gjithashtu ka qenë dëshmitar i gripit spanjoll, dhe është goditur dyfish kundër COVID-19. Gruaja më e vjetër e njohur në Tokë është Lucile Randon nga Franca, 118 vjeç, ndërsa burri më i vjetër është Juan Vicente Pérez Mora, nga Venezuela, 113 vjeç.

100 femrat më të vjetra kanë jetuar mesatarisht disa vite më shumë se 100 homologët e tyre meshkuj.