Ish-deputeti i PS në qarkun e Durrësit, Jurgis Çyrbja është arrestuar me urdhër të SPAK pasditen e së dielës.

SPAK dha detaje sot sa i takon hetimit ndaj ish-deputetit të PS Jurgis Çyrbja, Ahmet Mashës dhe Altin Hajrit.

Mësohet se Çyrbja dhe Masha k kanë zbuluar akte të cilat ligji i përcakton si sekret shtetëror në më shumë se 7 raste. Këto informacione më pas u janë dhënë përmes aplikacionit Sky ECC personave të shpallur në kërkim nga Policia.

Dyshohet po ashtu se Çyrbja pasi vihej në dijeni për operacione policore e kontrolle në Durrës, çonte informacion te personat në kërkim. Kështu ata i fshiheshin uniformave blu…

Sipas Prokurorisë së Posaçme, edhe gjatë ushtrimit të detyrës së tij si deputet, Çyrbja i ka ofruar favorizime të ndryshme Altin Hajrit.

Ky i fundit, i cili aktualisht është shpallur në kërkim ndërkombëtar, siguronte votues në funksion të mbështetjes së tij si kandidat për deputet në Qarkun e Durrësit në zgjedhjet parlamentare të vitit 2021.