Presidenti i rrëzuar i Sirisë, Bashar al Assad, ka mbërritur në Moskë, kanë konfirmuar mediat shtetërore ruse.

Assad dhe anëtarët e familjes së tij mbërritën në qytet të dielën, tha një burim i Kremlinit për agjencinë e lajmeve TASS.

“Assad dhe anëtarët e familjes së tij kanë mbërritur në Moskë. Rusia, për arsye humanitare, u ka dhënë atyre azil”, tha burimi.

Assad u largua nga kryeqyteti sirian i Damaskut pasi qeveria e tij ra, pas një ofensive të rrufeshme nga forcat kundër regjimit në të gjithë vendin – duke i dhënë fund sundimit të tij 24-vjeçar.

Ai u largua pasi dha urdhër që të kishte një transferim paqësor të pushtetit, tha më herët sot ministria e Jashtme ruse.

Ndërsa Assad ikte, pamjet që qarkullonin në mediat sociale tregonin familjet që plaçkisnin pallatet presidenciale në Damask, me disa duke bërë selfie në mjediset madhështore, ndërsa mijëra njerëz festonin në rrugë.

Regjimi sirian ishte përballur me një betejë në tre fronte – Hayat Tahrir al Sham (HTS) nga veriu, Fronti Jugor dhe një grup kurd në lindje./Telegrafi