Mbarë opinioni publik dhe sidomos pallati mbretëror, u tronditën nga intervista “bombë” e Princ Harry-t dhe Meghan Markle.

Dukesha e Sussex vendosi që në intervistën për Oprah Winfrey, të nxirrte në dritë prapaskenat e errëta të familjes mbretërore, që askush nuk i dinte më përpara.

Intervistën e nisën duke treguar gjininë e fëmijës së tyre të dytë, që shumë shpejt do të vijë në jetë. Djali i tyre Archie do të bëhet me motër dhe çifti është në qiellin e shtatë nga lumturia.

Më pas, Meghan vijon duke treguar se i dukej vetja si personazh i një tregimi, pasi hyri në mënyrë tepër naive në familjen mbretërore, pa mësuar asgjë për ta.

Por jo vetëm kaq, pasi intervista e shumëpritur vazhdoi me rrëfimin e sinqertë të tyre dhe të vërtetat që dolën sheshit, e që po komentohen shumë nga opinioni.

Gjithashtu Dukesha e Sussex është shprehur në një moment se pallati mbretëror i kishte marrë pasaportën kur ka nisur marrëdhënien me Harry-n, dhe që nga ai moment ajo nuk e ka parë më, deri kur u largua nga familja.

Por duket se kjo nuk është e vërtetë, pasi “Page Six” ka shkruar se Meghan ka bërë 13 udhëtime në gjysmën e botës, pasi u lidh me Princ Harry-n. Këto udhëtime nuk përfshijnë detyra mbretërore, por ka qenë si turiste. Nga New York në Ibiza, por edhe Itali e Amsterdam.

Dhe në të gjitha këto raste, Meghan duhet të ketë paraqitur patjetër pasaportë. Për “The Sun”, Margaret Holder, eksperte mbretërore, ka shpjeguar se pasaporta e Meghan si çdo dokument i familjes mbahej në pallat për siguri, por Dukesha e merrte sa herë i duhej.

Ndërkohë, çdo fjalë e deklaratës së Meghan po analizohet me imtësi e detaje, për të vërtetuar nëse fjalët janë ose jo të vërteta.