Kancelarja gjermane Angela Merkel, nuk ka dashur të thotë asgjë në lidhje me raportimet se Gjermania dhe Franca mund të caktonin një të dërguar special për dialogun Kosovë-Serbi.

Merkeli në një konferencë të përbashkët për medie me kryeministren e Serbisë, Ana Bërnabiq, ka thënë se Gjermania dhe Franca janë përpjekur, dhe janë ende duke u përpjekur, të iniciojnë dialogun si dhe të bëjnë diçka në lidhje me taksën e vendosur nga autoritetet e Kosovës ndaj produkteve serbe.

Ajo ka rikujtuar se procesi i dialogut është ndërprerë dhe se ky proces do të rifillojë pas zgjedhjeve të 6 tetorit në Kosovë.

“Deri më tani, nuk ka qenë e mundur të vendoset dialogu për shkak të taksës”, ka thënë ajo.

Kur është pyetur nga mediet nëse Berlini dhe BE-ja kanë ndonjë afat kohor kur mund të arrihet ndonjë marrëveshje ndërmjet Beogradit dhe Prishtinës dhe nëse data e pranimit në BE ajo e vitit 2025 është akoma e vlefshme për Serbinë, Merkeli është përgjigjur: “Sa më shpejt aq më mirë”.

“Nuk ka afate kohore kur disa gjëra duhet të mbarojnë, por sa më shpejt aq më mirë”, është shprehur Merkeli.