Mësimdhënësit në Kosovë sot kanë hyrë në ditën e tyre të 10-të të grevës në Arsim, ndërsa kërkojnë nga Qeveria e Kosovës përmbushjen e kërksave të tyre për rritjen e koeficientit në projektligjin për pagat.

Ky veprim i sektorit të Arsimit në Kosovë, ka zërë vend edhe në mediat e huaja ndërkombëtare, pasi ‘Reuters ‘shkruan se mësimdhënësit kosovarë për shkak të grevës kanë bërë që 500 mijë nxënës dhe studentë të mbesin në shtëpi për më shumë se një javë, transmeton ‘Klan Kosova’.

Më tej theksohet se edhe mjekët dhe minatorët gjithashtu kanë ndërmarrë veprime për grevë për paga më të larta dhe punonjës të tjerë të sektorit publik po kërcënojnë ta bëjnë këtë, pasi të jetë propozuar një ligj që do të rriste pagat për shërbyesit civil dhe punonjësit e tjerë të qeverisë.

Rritja e madhe e pagës së vitit të kaluar për kryeministrin Ramush Haradinaj – në 2,950 euro në muaj nga 1,443 – gjithashtu renditet me disa punonjës publikë.

“Hapi i parë që zyrtarët qeveritarë do të bënin është rritja e pagave për veten dhe stafin e tyre dhe ata na lënë në një mënyrë të mjerueshme”, është shpehur për Reuters Kadire Preniqi, e cila jep mësim në një shkollë fillore në kryeqytetin e Prishtinës.

Ndërsa ekonomisti i Prishtinës Naim Gashi ka deklauar se grevat e sektorit publik reflektojnë pakënaqësi rreth mospërputhjeve të pagave duke treguar dhe shembuj.

”Ka raste kur dikush që i lan enët në një institucion publik paguhet më shumë se një mësues”, është shprehu ai, njofton Klan Kosova.

Por Ruud Vermeulen, përfaqësuesi rezident i Fondit Monetar Ndërkombëtar në Kosovë tha se rritja e pagave prej 30 përqind do të ishte një barrë shumë e madhe për ekonominë, të cilën FMN pret të rritet 4.2 përqind këtë vit, krahasuar me 4 përqind në 2018.

“Një rritje prej 10 për qind e pagave për mësuesit do të kushtonte rreth 13-14 milionë euro, ose rreth 0.2 për qind të GDP-së (prodhimi i brendshëm bruto), një rritje prej 30 për qind do të kushtonte tre herë më shumë”, shkruan ai në një email tek Reuters.