Promotori i Tyson Furyt, Bob Arum, ka zbuluar se Anthony Joshua do të përballet me Oleksandr Usykun në qershor, në përpjekje për t’i rikthyer titujt e botës në kategorinë e rëndë për herë të dytë. Joshua u mposht nga Usyk dhe i humbi titujt e botës në kategorinë e rëndë WBA, WBO dhe IBF në shtator. Ajo ishte vetëm humbja e dytë e Joshuas në karrierë. Joshua e ka shfrytëzuar të drejtën për rimeç me ukrainasin dhe, megjithëse mendohej se ai do të ndodhte në prill, Arum njoftoi se qershori është muaji i caktuar për këtë luftë. “Ata do të luftojnë në qershor”, ka thënë Arum për Joshuan dhe Usykun.

Kohë më parë Joshua deklaroi se vijon të ndihet i zemëruar me veten, pas humbjes kundër Oleksandr Usyk, por këmbënguli se ajo disfatë po e nxit çdo ditë për t’iu hakmarrë ukrainasit. “Unë e di se mund të jem më i mirë se atë natë”, ka deklaruar Joshua për “BBC Sport” në dhjetor. “Është më e lehtë të thuash sesa ta bësh, por në zemër dhe në shpirt, në tru dhe në trup, ndiej vërtet se kam shumë për të dhënë. Jam i zemëruar. Zemërimi po rritet, por po më nxit çdo ditë”, ka shtuar britaniku.