Lionel Messi, kapiteni i kombëtares së Argjentinës, po përgatitet të përjetojë një tjetër Kupë të Amerikës. Skuadra e Scalonit, kampione në fuqi e botës, është padyshim favorite: “Gjithmonë kam thënë dhe përsëris se Argjentina është favorite. Ne jemi gjithmonë më të mirët, por nuk duhet t’i marrim gjërat si të mirëqena: kështu kemi pësuar kaq shumë zhgënjime në të kaluarën.

“Sot mund të themi se jemi më të mirët sepse jemi kampionët në fuqi të botës, por kjo nuk do të thotë se do ta fitojmë këtë Kupë të Amerikës duke ecur”, ka deklaruar Leo në një intervistë në “America TV” me gazetarin dhe ish-presidentin e San Lorenzo, Marcelo Tinelli.

Messi nënvizoi se Ekuadori “ka një brez të rinjsh shumë të mirë, të cilët dinë çfarë duan dhe janë intensivë” dhe përfshiu Kolumbinë, Uruguain dhe Brazilin në grupin e favoritëve. “Kjo është arsyeja pse unë them se do të jetë një Kupë e Amerikës shumë, shumë e luftuar. Grupi e di këtë dhe është i vetëdijshëm se ne do të duhet të japim më të mirën tonë dhe ende më shumë për të fituar përsëri”.

Kapiteni argjentinas nënvizoi atmosferën e mirë në dhomat e zhveshjes së Albiceleste: “Pasi kemi fituar kaq shumë vitet e fundit, kemi një qetësi më të madhe shpirtërore”. Më pas për triumfin në Katar: “Kam qenë gjithmonë mirënjohës për dashurinë që kam marrë gjatë karrierës sime, sikur të gjithë donin të përfundonte kështu, se unë nuk mund ta lija futbollin pa qenë kampion bote. “Dhe falë Zotit ishte e mundur, ishte një hakmarrje për humbje më 2014. Unë i plotësova të gjitha ëndrrat e mia dhe arrita më shumë. Nuk e kisha imagjinuar kurrë se do ta përjetoja të gjithë këtë. Mendoj se gjithçka ndodh për një arsyeje dhe se gjithçka është e shkruar”.