Lionel Messi ka gjetur golin e parë me Argjentinën në Kupën e Amerikës. Ylli argjentinas shënoi në gjysmëfinale ndaj Kanadasë, ku Argjentina fitoi me rezultat të pastër 2-0 për të kaluar në finalen e madhe.

Messi ka folur pas fitores ndaj Kanadasë, duke treguar se është i lumtur për suksesin e arritur. Megjithatë kapiteni i Argjentinës ka thënë se është i vetëdijshëm se këto janë sfidat e fundit të tij dhe po i shijon në maksimum.

“Po, jam i vetëdijshëm që këto janë betejat e mia të fundit, por po i shijoj të gjitha në maksimum”, ka thënë Messi për “Radio DSports”.

“Kualifikimi në një finale të re nuk ishte i lehtë. Duhet ta shijojmë këtë, të shijojmë çdo moment”, ka deklaruar ylli argjentinas. Messi ende nuk e ka konfirmuar nëse do të pensionohet nga futbolli ndërkombëtar, por besohet se ai do të luaj edhe në Kampionatin Botëror në vitin 2026.