Leo Messi shkëlqeu në ndeshjen e Argjentinës ndaj Bolivisë, duke realizuar 3 gola. Pas ndeshjes kualifikuese të Kupës së Botës, sulmuesi 37-vjeçar, në një intervistë të dhënë për mediat, foli për tërheqjen e mundshme nga kombëtarja.

“Është shumë bukur të vish këtu në kombëtare, të ndjesh dashurinë e njerëzve. Lidhja me njerëzit është fantastike, na pëlqen të luajmë këtu, me gjithë këta tifozë. Nuk ka të reja për të ardhmen time me Argjentinën, por vitet bëjnë të vetën. Ndoshta mund të jenë ndeshjet e mia të fundit me kombëtaren, do të varet shumë nga reagimi i trupit dhe forma sportive. Nuk kam caktuar një datë apo afat të fundit”, ka thënë Messi.

“Pavarësisht moshës sime, kur jam këtu, ndihem si fëmijë, sepse jam rehat me këtë ekip. Për sa kohë që ndihem mirë dhe mund të vazhdoj të performoj ashtu siç dua, do të vazhdojmë t’i shijoj kësi mbrëmjesh”, ka deklaruar Messi.