Nga studio e emisionit “Opinion” të gazetarit Blendi Fevziu, Presidenti Meta bëri të qartë qëndrimin e tij të prerë se Shqipëria duhet të jetë vendi i fundit në botë që mund të vejë në diskutim pavarësinë e Kosovës.

PJESË NGA INTERVISTA

Fevziu: Zoti President, a ndani ju dhe Kryeministri i Shqipërisë qëndrime të ndryshme për çështjen e shkëmbimit të territoreve ose korrigjimit të kufijve midis Kosovës dhe Serbisë? Dhe nuk besoj se ju dhe Kryeministri të mos keni folur të paktën ballë për ballë për këtë çështje kaq të rëndësishme, siç e quani ju.

Meta: Unë dua t’ju them dy gjëra për këtë çështje. E para, raporti im si President i Shqipërisë me të gjithë aktorët në Kosovë, aktorët institucionalë dhe drejtuesit kryesorë të opozitës, zotin Isa Mustafa dhe zotin Albin Kurti.

Qëndrimi im ka qenë dhe do të mbetet: të bëhet çdo përpjekje për një marrëveshje me Serbinë.

Së dyti, unitet, sepse çdo përçarje e defaktorizon Kosovën në raport me Serbinë dhe që ne do të përkrahim çdo gjë në përputhje me Kushtetutën e Kosovës.

Dhe tjetra, asnjë hap përpara pa koordinim të ngushtë në mënyrë të veçantë me Shtetet e Bashkuara të Amerikës, me Gjermaninë dhe Britaninë e Madhe. Natyrisht edhe me faktorë të tjerë. Pse? Sepse kanë qenë nga vendet kryesore të përkushtuara për çlirimin e Kosovës dhe për të gjithë arritjet e Kosovës deri tani. Ky ka qenë qëndrimi im.

Tani të kalojmë te Shqipëria, si President i Shqipërisë. Nëse ka një vend nga 115 vende pak a shumë, që e kanë njohur Republikën e Kosovës, vendi i fundit në botë që mund të pranojë një vënie sadopak në diskutim të pavarësisë së Kosovës, të integritetit territorial të Kosovës dhe të Gjykatës Ndërkombëtare të Drejtësisë që përmendet shumë pak, është Shqipëria.

Çdo shtet tjetër, përfshirë edhe aleatët tanë më të fortë dhe më të dashur, përveç Kosovës kanë edhe shumë çështje të tjera më të rëndësishme apo shumë më të rëndësishme. Ndërsa Shqipëria, çështjen më të rëndësishme ka Kosovën dhe stabilitetin në rajon.

Fevziu: Por këtu bëhet fjalë për konsolidim të pavarësisë së Kosovës dhe jo për vënien në diskutim të saj. Pse mendoni që ky proces e vë në diskutim?

Meta: Unë nuk thashë diçka që kishit ju në mendje, por bëra të qartë këtë qëndrim timin si President i Shqipërisë.