Ministria e Forcës së Sigurisë së Kosovës (MFSK) ka reaguar kundër djegies se veturës të pjesëtarit serb të FSK-së, J.J, në fshatin Zupq të Komunës së Zubin Potokut.

MFSK-ja ka vlerësuar se sulmet e tilla janë akte kriminale dhe të dënueshme.

“Këto akte kriminale bëhen me qellim që të frikësojnë pjesëtarët e FSK-së, nga qarqet kriminale dhe nacionaliste serbe  në pjesën veriore, të cilat shprehin urrejtje dhe papajtueshmëri me integrimet, zhvillimin e demokracisë dhe konsolidimin e shtetit të Kosovës”.

“Ministria e FSK-së dhe FSK-ja qëndrojnë fuqishëm në  mbështetje të pjesëtarëve të saj, të cilët përkundër  kërcënimeve dhe dëmtimeve reale  të pasurisë së tyre, vazhdojnë të jenë pjesë e FSK-së dhe të shërbejnë me dinjitet në kryerjen e obligimeve të tyre si pjesëtarë  të FSK-së.  Prandaj MFSK-ja kërkon nga institucionet shtetërore të Kosovës, Policia e Kosovës dhe KFOR-i, që të angazhohen seriozisht, me tërë fuqinë e ligjit, që të dalin në mbrojtje të jetës dhe pasurisë së pjesëtarëve të FSK-së, që të lihen të lirë  të realizojnë të drejtat e tyre si qytetarë dhe si njerëz të lirë  në përzgjedhjen e perspektivës së tyre jetësore”, është thënë në reagimin e MFSK-së.

Sipas këtij reagimi, Kosova dhe faktori  ndërkombëtar  duhet të garantojnë liri dhe siguri të plotë për të gjithë qytetarët, pavarësisht se në cilën pjesë të Kosovës jetojnë.

/Epoka e re/