Presidenti i Mali të Zi, Jakov Milatoviq, ka shkruar për 26-vjetorin e fillimit të bombardimeve të NATO-s, por nuk e ka përmendur arsyen pse është intervenuar.

“Sot 26 vjet më parë, NATO nisi bombardimin e Republikës Federale të Jugosllavisë, pjesë e të cilës ishte edhe Mali i Zi atë kohë”, ka shkruar Milatoviq në platformën “X”.

Ai ka përmendur viktimat e bombardimeve dhe ka thënë se është detyrë që të ruhet kujtimi i të gjitha viktimave të pafajshme të bombardimeve.

“Jetët e humbura dhe shkatërrimi nga lufta na kujtojnë se nuk ka alternativë ndaj politikës së paqes, respektit të ndërsjellë dhe bashkëpunimit dhe se një politikë e tillë është garancia e vetme e stabilitetit dhe prosperitetit për vendin dhe rajonin tonë. Është detyrimi ynë që të ruajmë kujtimin e të gjitha viktimave të pafajshme të bombardimeve, si ato në Murinë, por edhe të kontribuojmë së bashku në ndërtimin e një të ardhmeje më të sigurt për qytetarët tanë, në mënyrë që përvojat tragjike të së kaluarës të mos përsëriten kurrë”, ka shkruar Milatoviq.