Pavarësisht prej synimeve të mëdha që ka Feronikeli në ndeshjen ndaj Dukagjinit, Mark Milicaj është optimist se skuadra nga Klina do të nxjerrë rezultat pozitiv nga kjo ndeshje.

Skuadra e fundit në renditjen tabelore të IPKO Superligës në futboll, Dukagjini, është e gatshme që në ndeshjen që zhvillohet sot (e premte) do të nxjerrë rezultat pozitiv kundër Feronikelit. Mark Milicaj ka thënë për “Epokën e re” se “Nikli” është duke kaluar nëpër një formë të mirë, por fitoren e ka të pamundur në Klinë.

“Në ndeshjen e radhës do të përballemi me Feronikelin. Do të jetë një ndeshje shumë e vështirë pasi Feronikeli është në formë të mirë çka dëshmoi edhe në ndeshjen e Kupës ndaj Ballkanit dhe në kampionat kundër Vushtrrisë, por besojmë se me një angazhim maksimal nga të gjithë futbollistët mund të marrim rezultat pozitiv”, ka thënë Milicaj, i cili ka bërë me dije se synon që t’i shënojë ish-skuadrës së tij.

Anësori i njohur në futbollin e Kosovës ka konfirmuar se respektin për klubin nga Drenasi do ta ruajë përgjatë gjithë jetës. “Kam qenë pjesë e Feronikelit vite më parë dhe kam kaluar shumë mirë. Nëse i shënoj gol, normalisht se do të gëzohem, por kjo nuk do të thotë se kam humbur respektin për këtë skuadër”, ka shtuar Milicaj.

Skuadra e Dukagjinit pozicionohet në pozitën e fundit me vetëm dhjetë pikë, kurse Feronikeli pozicionohet në pozitën e pestë me 37 pikë të grumbulluara. Për ndeshjen që zhvillohet në kuadër të javës së 24-t në elitë, ka folur edhe mesfushori Albert Dabiqaj. Ky i fundit ka paralajmëruar fitore në këtë ndeshje. “Kundërshtari i radhës është në pozitën e fundit, por ka një skuadër të mirë. Ne shkojmë për fitore dhe besoj se do t’ia arrijmë këtij qëllimi”, ka thënë Dabiqaj. Sot (e premte) zhvillohet ndeshja në mes të Flamurtarit dhe Ballkanit, e cila, po ashtu, fillon nga ora 17:00.

IPKO Superliga – Java e 24-t

Të premten takohen:
17:00 Dukagjini – Feronikeli
17:00 Flamurtari – Ballkani

Të shtunën takohen:
17:00 Vushtrria – Prishtina
17:00 Llapi – Drenica

Të dielën takohen:
17:00 Trepça ’89 – Drita
17:00 Ferizaj – Gjilani

(Veton ZYMBERI)