Sekretari britanik i Mbrojtjes, Ben Wallace, ka thënë se pushtimi i Ukrainës do të shënojë rënien e presidentit rus, Vladimir Putin.

Wallace ka thënë se forcat ruse, që janë angazhuar në pushtimin e Ukrainës, janë “rraskapitur” tashmë nga rezistenca e forcave lokale.

Ai ka thënë se ushtria ruse po përballet me probleme logjistike dhe ka pësuar mijëra humbje në 13 ditët e para të pushtimit.

Wallace ka thënë se është “detyrë e pamundur” të pushtosh një vend me 44 milionë banorë.

“Ky do të jetë fundi i Putinit dhe kështu duhet të jetë”, ka thënë Wallace për “BBC”-në.

Sipas tij, Putin është tashmë “një forcë e shpenzuar” në botën e gjerë, sepse komuniteti ndërkombëtar ka konstatuar se pushtimi i Ukrainës dhe katastrofa humanitare që ai ka shkaktuar, “janë të papranueshme”.

Sanksionet ndërkombëtare, të vendosura ndaj Rusisë, “po e zvogëlojnë ekonominë e tij në zero” dhe Putin “është përgjegjës për këtë”, ka thënë Wallace.

Perëndimi ka ndërmarrë një varg sanksionesh ekonomike dhe diplomatike kundër Rusisë, pasi kjo e fundit ka nisur pushtimin e Ukrainës, më 24 shkurt.

Putini ka dhënë urdhrin për pushtim pasi nuk ka marrë garanci nga NATO-ja se nuk do të zgjerohet më drejt lindjes.