Ministri francez i Çështjeve Evropiane, Clement Beaune, ka thënë se anëtarët e Bashkimit Evropian (BE) mund të arrijnë një marrëveshje gjatë kësaj jave për propozimin e Komisionit Evropian për ndalesën e të gjitha importeve të naftës nga Rusia.

“Mendoj se ne mund të arrijmë marrëveshje gjatë kësaj jave”, ka thënë Beaune për televizionin “LCI”.

Ai ka thënë se presidenti francez, Emmanuel Macron, më vonë gjatë 10 majit, do të bisedojë me kryeministrin hungarez, Viktor Orban, për këtë çështje.

Hungaria është kritikja më e madhe e embargos mbi naftën ruse.

Presidentja e Komisionit Evropian, Ursula von der Leyen, ka thënë të hënën se ka bërë përparim në bisedimet me Orbanin, sa i përket kësaj çështjeje.

Më 4 maj, von der Leyen, ka prezantuar propozimin e KE-së, si pjesë e pakos së gjashtë të sanksioneve të BE-së kundër Rusisë, për shkak të pushtimit të Ukrainës.

Komisioni ka parashikuar që BE-ja të heqë dorë plotësisht nga nafta e papërpunuar ruse dhe produktet e rafinuara deri në fund të vitit. Por, për të miratuar këtë pako të gjashtë të sanksioneve kërkohet mbështetja unanime e 27 shteteve anëtare të bllokut evropian.