Kosova për herë të parë do të debutojë në garat e FIBA Europe Cup në 3×3. Ekipin e Kosovës të enjten e ka pritur në një takim ministri i Kulturës, Rinisë dhe Sportit, Kujtim Gashi.

Ai i ka uruar sukses ekipit të Kosovës që për herë të parë po prezantohet në një garë të tillë, duke i ofruar përkrahje dhe duke shpresuar se do të kthehet me suksese. Ministri Gashi i ka dhuruar ekipit një flamur të Kosovës, me shpresë se ky flamur do të ngritët sa më lart në Rumani.

Ndërsa ekipi i Kosovës, së bashku me koordinatorin Agon Fehmiun, kanë folur për rëndësinë e garës që do të marrin pjesë, kurse kanë shtuar se do të japin 100 % nga vetja për ta prezantuar sa më mirë shtetin e Kosovës. Në fund ata i kanë dhuruar një fanellë të Kosovës ministrit Gashi dhe e kanë falënderuar për përkrahjen.

Ekipi i Kosovës përbëhet nga Altin Sahiti, Albatrit Berisha, Arti Hajdari dhe Arian Mehmeti. Kosova është në grup me Slloveninë dhe Andorrën, kurse garat do të zhvillohen të dielën.  Gara 3×3 po mbështetet edhe nga Federata e Basketbollit e Kosovës, që shpreson se kjo lojë do të popullarizohet edhe më shumë në vendin tonë.