Ministri i Financave, Bedri Hamza, në shoqërim të presidentit Hashim Thaçi, po merr pjesë në takimin e lartë të Këshillit të Biznesit të MEDEF Internacional, i cili po mbahet në Paris të Francës.

Me këtë rast, ministri Hamza i ka informuar pjesëmarrësit me kushtet që ofron Kosova për investitorët e huaj, me këtë rast edhe ata francez.

Ai ka folur për lidhjen e fortë që ka Kosova me diasporën.

Hamza ka bërë me dije se Kosova ka bërë shumë reforma dhe është duke bërë në vazhdimësi. “Këtë e dëshmon edhe raporti i Bankës Botërore. Në tri vitet e ardhshme pritet që Kosova të ketë rritje ekonomike mbi 5 për qind. Kemi sistem tatimor të thjeshtë, tatojmë vetëm 10 për qind në Korporata. Kemi marrë masa për reforma fiskale, kemi liruar nga tatimi doganor lëndën e  parë, gjysmë produktet, linjat e prodhimit dhe TI-së. Po ashtu, kemi liruar nga tatimi i akcizës lëndët ndihmëse. Jemi të lumtur që tani kemi parë rezultate pozitive në rritje të prodhimit”, ka thënë ministri Hamza.

Ai ka theksuar se Kosova ka infrastrukturë rrugore të mirë. “Po ashtu, kemi filluar me përmirësimin e infrastrukturës hekurudhore. Jemi duke punuar për thjeshtëzim të procedurave doganore për kalim të kufirit në mënyrë që këto rrugë të shfrytëzohen sa më shumë nga ana e gjithë biznesit, duke përfshirë edhe bizneset e shteteve tjera gjatë kalimit transit, është shprehur ai.

Ministri Hamza ka theksuar se sistemi bankar në Kosovë është shumë stabil. “75 për qind bankat në Kosovë janë në proces ndërkombëtar, kredit joperformuese janë vetëm 3.5 për qind, gjë që është më e ulëta në rajon dhe në Evropë. Kosova gjithashtu ka borxhin më të ulët në rajon dhe jemi të kujdesshëm me  borxhin, ne gjithmonë do të marrim borxh i cili do të na kthehet në zhvillim të vendit”, ka deklaruar ministri Hamza.

Ai gjithashtu ka thënë se populli i Kosovës e çmon shumë lirinë dhe e kupton se garanci e lirisë është zhvillimi ekonomik.