Ministri i Ekonomisë dhe Ambientit, Blerim Kuçi, ka thënë se do ta shqyrtojë dorëheqjen nëse Autoriteti Kosovar i Konkurrencës vlerëson se ka konflikt interesi në tenderin 5 milionë eurosh, të fituar pikërisht nga kompania e tij. “Nëse konkludohet se në këtë rast ka konflikt interesi, unë do ta shqyrtoj dorëheqjen nga pozita ime e ministrit të Ekonomisë”, ka thënë ai mbrëmë, në një emision televiziv. Pas kësaj, Kuçi u largua duke thënë se nuk pranon të flasë për çështje të tjera, ani pse duhej të përgjigjej si ministër për temat në të cilat ka përgjegjësi. Kujtojmë se për disa ditë radhazi në vend është diskutuar tenderi 5 milionë euro për ndërtimin e spitalit të Prizrenit, i cili është fituar pikërisht nga kompania “Hidroterm”, pronar i së cilës është Blerim Kuçi.