Një ditë pasi Kina simuloi sulme në Tajvan gjatë stërvitjeve ushtarake rreth ishullit, Ministri i Jashtëm i Tajvanit Joseph Wu dënoi veprimet e Pekinit në një intervistë ekskluzive me CNN dhe paralajmëroi se Kina po përpiqet të përgatitet për të nisur një luftë kundër Tajvanit.

“Udhëheqësit kinezë do të mendojnë dy herë përpara se të vendosin të përdorin forcën kundër Tajvanit. Dhe pavarësisht nëse është 2025 apo 2027 apo edhe më tej, Tajvani thjesht duhet të përgatitet”, tha ai.

Pekini nisi stërvitjet të shtunën, një ditë pasi presidentja e Tajvanit Tsai Ing-wen u kthye nga një vizitë 10-ditore në Amerikën Qendrore dhe Shtetet e Bashkuara, ku u takua me kryetarin e Dhomës së Përfaqësuesve të SHBA Kevin McCarthy dhe ligjvënës të tjerë amerikanë.

Pekini kreu stërvitje të ngjashme ushtarake në shkallë të gjerë rreth Tajvanit gushtin e kaluar, pasi kryetarja e atëhershme e Dhomës së Përfaqësuesve të SHBA-së, Nancy Pelosi vizitoi ishullin.

Këto stërvitje përfshinin lëshimet e raketave kineze mbi ishull, diçka që nuk është parë deri më tani në stërvitjet aktuale.

Tajvani dhe Kina janë qeverisur veçmas që nga përfundimi i një lufte civile më shumë se shtatë dekada më parë, në të cilën nacionalistët u larguan në Taipei. Tajvani kaloi nga sundimi autoritar në një demokraci në vitet 1990 dhe tani renditet një nga juridiksionet më të lira në Azi nga Freedom House, një organizatë jofitimprurëse me bazë në SHBA.