Ministri i Mbrojtjes, Rrustem Berisha, dhe komandanti i FSK-së, gjenerallejtënant Rrahman Rama, me rastin e 20-vjetorit të masakrës së Reçakut kanë bërë homazhe te varrezat duke nderuar të gjithë martirët dhe të rënët për liri.

“Masakra e Reçakut e ndodhur 20 vite më parë tmerroi botën, e cilësuar nga heroi i atyre ditëve, ambasadori William Walker, si krim kundër njerëzimit, do të njihet si një nga ngjarjet kryesore që ka shënuar një kthesë të madhe në diplomacinë ndërkombëtare në raport me Serbinë e asaj kohe dhe Kosovën, duke i paraprirë të gjitha ngjarjeve të mëvonshme, deri te liria dhe shteti i pavarur i Kosovës”, ka thënë ministri Berisha.

Ai ka shtuar se Reçaku është gurthemeli i shtetit të Kosovës dhe fundi i një epoke të rëndë hegjemoniste.

“Sot, fal gjakut të heronjve, dëshmorëve dhe viktimave të gjenocidit hegjemonist serb, kemi edhe Ushtrinë e Kosovës e cila ashtu si dikur Ushtria Çlirimtareve Kosovës, do të jetë gjithmonë mbrojtësi i vendit, i popullit të Kosovës dhe garantuesi i paqes”, ka deklaruar Berisha.

Ministri Berisha dhe komandanti i FSK-së gjeneral Rama, gjatë vizitës në Kompleksin Përkujtimor takuan qytetarët e pranishëm të Raçakut, të cilëve ju shprehën ngushëllimet dhe njëkohësisht edhe krenarinë për familjarët e tyre, duke çmuar lartë sakrificën e të rënëve të Reçakut, për lirinë e Kosovës.

/Epoka e re/