Ministri i Mjedisit dhe Planifikimit Hapësinor, Fatmir Matoshi, ka pritur të martën në takim kryetarët e katër komunave: Prizren, Podujevë, Obiliq dhe Novobërdë, me të cilët ka nënshkruar memorandume të bashkëpunimit për financimin e disa projekteve në fushën e mjedisit.

Me rastin e nënshkrimit të këtyre memorandumeve ministri Matoshi ka ripërsëritur gatishmërinë e tij dhe të ministrisë që ai drejton për përkrahjen e komunave në përmirësimin e gjendjes së mjedisit.

Projektet për të cilat u nënshkruan memorandume të bashkëpunimit janë: 1. Ndërtimi i ujësjellësit në Gjonaj, Prizren, i cili kap vlerën prej 277 mijë euro, dhe do të zgjidhë problemin e sigurimit të ujit të pijshëm për banorët e kësaj pjese të Prizrenit; 2. Vazhdimi i projektit të rregullimit të shtratit të lumit Llap, Podujevë, në vlerë prej 150 mijë euro; 3. Ndërtimi i kanalizimit Breznicë – Kozaricë, në vlerë totale 100 mijë euro për këtë vit, dhe po ashtu me 100 mijë euro është mbështetur edhe vitin e kaluar; 4. Ndërtimi dhe rregullimi i kanalizimit në fshatin Breznicë – Kozaric – Obiliq, 100.000 euro; 5. Rregullimi i hapësirave gjelbëruese dhe mbjellja e drunjve – Obiliq, 50.000 euro; 6. Pastrimi i lumenjve, përroskave dhe kanaleve, Obiliq, 100.000 euro; 7. Pastrimi i lumenjve në Kufcë, Stanishor, Prekovc dhe llabjan, i cili kap vlerën buxhetore prej 200 mijë euro për këtë vit.

Përveç këtyre projekteve MMPH-ja, këtë vit në këto komuna realizon edhe projekte tjera për të cilat procedurat i zhvillon ministria. “Të gjitha këto projekte janë edhe një hap më shumë në angazhimin tonë të përbashkët për përmirësimin e gjendjes së mjedisit dhe ngritjen e mirëqenies së qytetareve të vendit”, ka deklaruar ministri Matoshi.

Ai para kryetarëve të këtyre komunave ka shprehur besimin e tij që këto projekte do të realizohen me kohe dhe do të kenë një menaxhim efikas nga komunat përkatëse. Njëkohësisht ministri Matoshi ka kërkuar nga kryetarët një angazhim më të madh në mbrojtjen e mjedisit, mirëmbajtjen e zonave të gjelberta, mbrojtjen e lumenjve nga ndotja, dhe krahas kësaj të vetëdijesojnë qytetarët për mbrojtjen e mjedisit edhe përmes aplikimit të gjobave.

Nga ana tjetër kryetarët e komunave: Agim Veliu, Mytaher Haskuka, Xhafer Gashi e Svetislav Ivanoviqi, falënderuan ministrin Matoshi për përkrahjen e vazhdueshme dhe financimin e këtyre projekteve që sipas tyre janë shumë të rëndësishme për mjedisin dhe qytetarët e komunave të tyre.

/Epoka e re/