Ministri i Shëndetësisë, Uran Ismaili, ka bërë me dije se as politika dhe as menaxhmenti shëndetësor nuk do të jenë strehë e papunëtorëve dhe të papërgjegjshmëve të cilët i lënë zyrat dhe nuk u ofrojnë shërbime pacientëve.

“Ne nuk do të mbrojmë askënd që lë pacientët, qytetarët tanë, pa shërbime cilësore.

Dhe, çfarë është më e rëndësishmja, nuk do të lejojmë që disa raste të njollosin punën e mijëra punëtorëve shëndetësor, të cilët me dinjitet dhe vullnet të madh po kontribuojnë në avancimin e reformave që kemi nisur”, ka shkruar Ismaili në llogarinë e vet në “Facebook”.

Ai ka paralajmëruar masa ndaj punëtorëve të papërgjegjshëm në ditët në vijim.

“Së fundi, kemi marrë disa ankesa nga qytetarët, të cilat kanë dërguar edhe fotografi dhe video të ndryshme. Prandaj, unë kam marrë vendim që të nisi një seri takimesh me akterë relevantë për t’i trajtuar të gjitha rastet. Nga këto takime do të dalim me një vendim: Ose do të marrim masa ndaj papërgjegjësisë, ose të gjithë ata të cilët e gjejnë veten në atë mes duhet të largohen vet”, ka thënë Ismaili.

Postimi i tij i plotë:

Të dashur qytetarë, nuk do të jemi strehë e papunëtorëve dhe të papërgjegjshmëve!

Në këto nëntë muaj të qeverisjes, kemi nisur shumë investime në spitalet dhe klinikat tona, të cilat ngadalë po e ndryshojnë gjendjen në sektorin shëndetësor.

Ndalëm avazin e vjetër të blerjes së barnave me çmime shumëfish më të larta, krijuam shërbimin 24 orësh për mjekimin e sëmundjeve të zemrës në Kardiokirurgji, shtuam sallat e operacioneve, jemi duke blerë pajisje të shumta të cilat kanë munguar me vite të tëra, kemi lëshuar Repartin e ri të mjekimit Intenziv etj.

Kemi rritur pagesat për kujdestaritë e profesionistëve shëndetësor dhe jemi duke punuar çdo ditë në Ligjin për paga, që ata më në fund të kenë kushtet që i meritojnë.

Ndërsa tani kemi nisur edhe stabilizimin e furnizmit me barna për institucionet shëndetësore publike, që pacientët të mos kenë nevojë t’i blejnë më ato.

Ngadalë, po e fusim shëndetësinë në binarët e drejtë të një sistemi funksional ku askush nuk do të ndihet i lënë anash.

Por, krahas shtimit të investimeve, përmirësimit të kushteve për personelin mjekësor dhe pacientët, do të shtohen edhe masat për rritjen e disiplinës në punë.

Kjo, në veçanti ndaj pa punëtorëve të cilët i shohin spitalet dhe klinikat tona publike si recepsione referuese.

Së fundi, kemi marrë disa ankesa nga qytetarët, të cilat kanë dërguar edhe fotografi dhe video të ndryshme.

Meqë qytetarët janë epiqendra e shërbimeve tona për të cilët ne jemi duke e bërë gjithë këto punë, edhe këto ankesa nuk do të kalojnë pa u trajtuar.

Prandaj, unë kam marrë vendim që të nisi një seri takimesh me akterë relevantë për t’i trajtuar të gjitha rastet.

Nga këto takime do të dalim me një vendim: Ose do të marrim masa ndaj papërgjegjësisë, ose të gjithë ata të cilët e gjejnë veten në atë mes duhet të largohen vet.

As politika, por as menaxhmenti shëndetësor, nuk duhet dhe nuk do të jemi strehë e pa punëtorëve dhe të papërgjegjshmëve, të cilët i lënë zyrat dhe dhomat e kontrollit të zbrazëta.

Ne nuk do të mbrojmë askënd që lë pacientët, qytetarët tanë, pa shërbime cilësore.

Dhe, çfarë është më e rëndësishmja, nuk do të lejojmë që disa raste të njollosin punën e mijëra punëtorëve shëndetësor, të cilët me dinjitet dhe vullnet të madh po kontribuojnë në avancimin e reformave që kemi nisur.

/Epoka e re/