Ministri i FSK-së, Armend Mehaj, ka thënë se është në komunikim të vazhdueshëm me njësitë e specializuara të forcave në terren. Ai ka thënë se Kompania e Specializuar për Detektimin e Materieve të Rrezikshme është duke bërë analizat kimike dhe biologjike të mostrave të ujit.

Tutje ai ka treguar se po bëhet vlerësimi i përgjithshëm i i situatës në qytetin e Decanit.

“Të dashur bashkëqytetarë të mi deçanas, Qytetarë të dashur të vendit tim, Jam në komunikim të vazhdueshëm me njësitë e specializuara të FSK-së në terren. Gjatë ditës menjëherë është ngritur gjendja e gatishmërisë së plotë operacionale. Dhe përveç monitorimit të situatës, menjëherë janë aktivizuar në operacion Kompania e Specializuar për Detektimin e Materieve të Rrezikshme duke bërë analizat kimike dhe biologjike të mostrave të ujit”, ka shkruar ai.

Ai thotë se këto aksione do të vazhdojnë 24 orë në ditë deri në momentin kur të kthehet gjendja normale.

“Krahas këtij aktiviteti, Kompania për Operacione Civile është angazhuar në vlerësimin e përgjithshëm të situatës së krijuar. Gjithashtu kemi dërguar oficerin ndërlidhës i cili do të jetë pjesë e Shtabit Emergjent në Komunën e Deçanit. Njësitet tona vazhdojnë operacionet dhe në bazë të vlerësimit të situatës, nëse shfaqet nevoja, do të aktivizojmë edhe njësitet tjera me resurset njerëzore profesionale me flotën e automjeteve dhe pajiset e specializuara. Operacionet tona zhvillohen pa ndërprerje 24 orë në 7 ditë të javës dhe në këtë mënyrë do të vazhdojmë deri në tejkalimin e situatës emergjente dhe rikthimin e gjendjes normale. Ky është Misioni ynë! Kjo është Detyra jonë!”, shtoi ai.