Gjatë qëndrimit në Londër për Samitin e Investimeve të Ballkanit Perëndimor, organizuar nga Banka Evropiane për Rindërtim dhe Zhvillim, ministri i Financave, Punës dhe Transfereve Hekuran Murati, u takua me martin Vickers, i dërguar i posaçëm për tregtinë në Ballkanin Perëndimor, njëherësh edhe kryetar i Grupit Gjithëpërfshirës Parlamentar për Kosovën në Parlamentin e Mbretërisë së Bashkuar.

Ministri Murati e ka informuar Vickers për performancën e mirë ekonomike të Kosovës gjatë vitit të kaluar, duke vënë theksin në rritjen ekonomike.

Kjo, siç u shpreh ministri, vije kryesisht si rezultat i rritjes së eksporteve të mallrave dhe shërbimeve, pranisë së theksuar të diasporës në vend, si dhe luftës së vazhdueshme kundër informalitetit.

Gjithashtu, ministri Murati e ka njoftuar Vickers edhe lidhur me mundësitë që ofron Kosova për investitorë të huaj, siç janë fuqia e re punëtore, normat e ulëta tatimore, si dhe sektori bankar i avancuar.

Më tej, u diskutua edhe procesi i themelimit të Gjykatës Komerciale, e cila synon në mënyrë specifike përmirësimin e klimës së investimeve duke ulur barrën administrative për kontestet komerciale.

Ministri Murati ftoi kompanitë britaneze të shqyrtojnë mundësitë për investime dhe vendosje të kapaciteteve të tyre prodhuese në Kosovë.