Pesë zyrtarë të Agjencisë për Zhvillim të Bujqësisë janë pezulluar përkohësisht nga puna me kërkesë të ministrit të Bujqësisë, Pylltarisë dhe Zhvillimit Rural, Faton Peci.

Në njoftimin e kësaj ministrie thuhet se ky vendim është marrë për vendosjen e ligjshmërisë dhe rendit brenda institucionit.

“Ky vendim është marrë si domosdoshmëri për zbatimin e bazës ligjore në fuqi, si dhe njoftimit të marrë nga Drejtoria për Hetimin e Krimeve Ekonomike dhe Korrupsion të datës 03 mars 2021, për masat e ndërmarra ndaj këtyre zyrtarëve, të cilët dyshohen për veprat penale “marrje e ryshfetit” dhe “keqpërdorim i detyrës zyrtare””.

Vendimi për pezullimin nga marrëdhënia e punës do të jetë në fuqi deri në marrjen e një vendimi tjetër nga organet përgjegjëse.

Zyrtarët e pezulluar ishin arrestuar gjatë muajit shkurt nën dyshimin për veprat penale “marrje e ryshfetit” dhe “keqpërdorim i detyrës zyrtare.